Shillong, Risaw 27
Ka Mawsynram ka dei kawei na ki thaiñ kaba hap hapoh ka East Khasi Hills bad kaba la bna nam bha ym tang ha ka jingjur jong u slap hynrei ruh ha ka jingdon ïa ki jaka jngohkai kiba bun bad kiba itynnad bha.
Kawei na kine ki jaka jngohkai pyrthei kaba la tip kum ka ‘Split Rock’ kaba don ha ka shnong Mawlongbna harud surok ban hiar sha ka Shnong Thyllaw, ka la khring bha ïa ki nongjngohkai pyrthei kiba na ka Jylla bad na kiwei-kiwei de ki Jylla jong ka Ri bad ruh nabar jong ka ri ruh kumjuh.
Ka jingkhring jong kane ka jaka, kaba long da u mawsiang, bad kaba la kad arliang, ba la tip ruh kum ka ‘Split Rock’ ka long ba kum ki nongleitjngoh, ki ïoh ban rung lyngba u ne u maw ban hiar sha trai duh lyngba ki jingkieng kiba la shna da ki dieng na kawei ka bynta bad ban mih pat sha bar na kawei ka bynta.
La sakhi ba ki paidbah ha katei ka jaka ki la wan ban tuid ban leit rung shapoh, namar ka long ka jaka kaba itynnad bad ka bapher na kiba bun ki jaka jngohkai.
Ka jaka ba don une u ‘Split Rock’ ba don ha ka shnong Mawlongbna kadei ruh kaba don marjan bad kawei na ki jaka jngohkai pyrthei, kata ka Umkhakoi kaba ki briew baroh ki ju sngewtynnad ban leit namar nalor ba ka don ka pung kaba heh bad ba itynnad ha kaba ki nongleitkai ki ïoh ban shonglieng, ban jngi bad ban ïaid kai pyngad ruh kumjuh, ka don ruh ka wah ha kaba ki nongleitkai ki ïoh ban leit ïa ka ‘River Trek’ ha kaba la don da ki nongïalam ne ki guide. Haba phai pat sha u ‘Split Rock’, hapoh jong ka, ki don ki jaka ba itynnad, ki krem bad ka lynti ïaid ba itynnad, ban khring ïa ki paidbah nong jngohkai pyrthei, kum ki maw siang, ki thieddieng bapiar hajrong ka mawsiang nalor kiwei-kiwei de.
Haba ïaid ïa katei ka ‘Split Rock’ ka shim por haduh kumba shiteng kynta ei-ei, namar ka long kaba jrong ban ïaid naduh sdang haduh kut.
Hadien ba ki nongjngoh kai pyrthei ki la dep ban ïaid pyngad naduh ba sdang haduh ba kut u ‘Split Rock’ shapoh kin ïoh ban shongthait ha jrong u mawsiang u ba heh kaba la shna kyrpang ruh ïa ki jaka ba ki nongwan jngohkai kin ïoh ban shong jah thait.
