Ka Nongnah ka long ka shnong kaba rit bha ha ki por ba mynshuwa. La ong ka don tang 7-8 tylli ki longïing ba sop da u phlang. Ka jaka ba ka Nongnah ka buhai shnong ka dei ha ‘Kper bah’ kaba don ha khlieh riat phot syntih bad phang shathie ka riat ba don ka pung sum shrieh mynta. Ki briew kiba wan buhai shnong nyngkong eh ki ong ki dei na ki thaiñ Jakrem bad kiwei kiwei.
Kane ka long ka jingïathuh ki riew tymmen. Kane ka jaka ha kper bah ka long syriem kum ka ryndang briew, la ker da ki riat bah baroh arliang. Ka phang ba shaneng ka long kum ka khlieh ka ïar bad kumjuh ka phang ba sharum ruh ka iar bha. Ki shnong phang sepngi kiba la tip mynta kum ka Nongkdait, Domsohkhai bad Thangrai. Ki shnong phang Mihngi la tip kum ka Nongktieh, bad Nongbah.
Dei kumno ki sa ioh bad khot kyrteng kum ka Nongnah. Nongnah ka mut ka shnong kaba rit. Hynrei katba nang ïaid ki sngi ki bnai bad ki snem ki jingkylla ki la nangroi ki shnong ki thaw ki la nangmih ha baroh ki jaka. Ki shnong kiba don ha ki phang sep-ngi dong ba sharum ki long ka Nongkdait, Domsohkhai, Mawhyndeng bad Thangrai.
Ki shnong kiba mih ha ki phang Mihngi ba shaneng ki long ka Nongktieh bad Nongbah bad Mawtajam mynta. Mynta hangne ha Kper bah kaba la ioh ïa ka kyrteng Nongnah ym don briew ba shong shuh. Namar ki la kynriah noh na kane ka jaka. Bad ïa ka jingker kper ruh la pynpra. Kane ka long ka dak kaba paw shai shisha namar ha ka por ba ngi dang khynnah rit ruh la ïaid bad kiew lyngba kane ka kper. Mynta te ym don kper shuh.
C. B. Iawphniaw
