Shillong, Risaw 27
U nongïalam ka National People’s Party (NPP) bad Symbud Myntri Rangbah ka Jylla, u Bah Sniawbhalang Dhar u la pynpaw ïa ka jingkyrmen skhem ba ka seng jong u ka long kaba la khreh na ka bynta ka ilekshon ban wan sha ka Garo Hills Autonomous District Council (GHADC).
“Ngi la pynkhreh bha. Ngi trei miet la bad sngi. Ngim shim sting ïa kiei-kiei,” la ong u Bah Dhar bad bynrap ba u Myntri Rangbah ka Jylla, u Conrad Sangma u leit ïalap la kumno-kumno shi sngi ne ar sngi ha ka shi taïew sha Ri-lum Garo ban khmih ïa ki jingpynkhreh jong ka seng.
Katkum ki khubor ba la ïoh lum, u Bah Dhar u la ong ba ki jingkyrmen jong ka NPP ha katei ka thaiñ ki long kaba bha shi kat dei, bad u don ka jingkyrmen ba ka jingmih kan long kaba man bha hadien ka ilekshon.
Haba kylli, u Bah Dhar u la ong ba ka long kaba eh ban ong la ka don ne em ka jingbymhun bad jingpyrshah (anti-incumbency) ïa ka seng, hynrei kano-kano ka Sorkar kaba synshar kan mad beit ïa ki jingshah kynthoh.
Haba ïadei bad ka mat jong ki nongtrei ka GHADC, u Bah Dhar u la ong ba ka NPP ka la wanrah da ka rukom treikam ban pynbeit ïa kane ka jingeh – ym dei na ka bynta ka ‘propaganda’ ilekshon hynrei na ka bynta ka jingmyntoi bad ka bha ka miat jong ki nongtrei.
“Suki-suki, yn sa pynbeit ïa kane ka mat,” u la bynrap.
U Bah Dhar u la ban jur ba ka jingleh bha jong ka seng kan shong khamtam ha ka jingjied ïa ki kyrtong, bad ki mat halor ka jingbymhun bad jingpyrshah ki lah ban long pyrshah ïa ki MDC shimet ne ïa ka Executive Committee.
“Namarkata, ngi donkam ban trei ha baroh ki liang ban pyntikna ba ka seng ka leh bha ha ki ilekshon ban wan,” u la ong.
Halor ka jinglah ban don ki MDC ka Trinamool Congress (TMC) ban pynïasoh sha ka NPP, u Bah Dhar u la ong ba kumba ka long mynta, kim pat pynsngew eiei.”
