Shillong, Risaw 27
Ka jingïalehkai ‘group’ jong ka Meghalaya Women’s State League 2025 ka la poi sha kaba kut ha ka lah sngi U Blei ha kaba ka Laitkor SC ka la ïoh ban bat ïa ka kyrdan ba hakhlieh ha ka Group-A hadien ba ka la lah ban pynliem noh ïa ka Pay For Right Football Academy da 2-1 kol ha SSA Stadium kaba ha Polo.
Baroh ar kitei ki kynhun ki dei kiba la mihkhmat na ka Shillong Sports Association bad baroh ar ki la jop mar lai sien ha ki jingïalehkai ba la lah. Ka Laitkor, kaba long ka lahduh ha ka SSA Women’s League 2024, ka la lah ban ïalehkai bha pyrshah ïa ka PFR, kaba la wan ba-ar ha katei ka lympung ba la pynïaid da ka SSA.
Ha ka kylla step ka Laitkor ka la thep tang shi kol lyngba ka Inrila-i-dor Khongthaw (6), hynei ka la thep biang sa shi kol ha ka kylla miet lyngba ka Ïaraplang Nongrum (53). Hadien katto katne por ka PFR ka la pynphai kylla shi kol lyngba ka Nisilia Majaw (64). Haduh kaba kut kane ka kynhun kam shym ka lah ban pynphai bad ka Laitkor ka la khur ïa ka jingjop.
Haba phai sha ka jingïalehkai ha ka sngi Saitjaiñ, ka Attacker’s Youth Club na Ri-Bhoi District Sports Association ka la pynliem noh ïa ka Lapalang SSCC na Riwar Mihngi Football Association da 9-0 kol. Ka Pynibha Rangthaluh (14, 19, 29, 70, 79 & 81) ka la khur da ar tylli ki hat-trick, bad ïa kiwei pat la bynrap da ka B Pyngrope (31) bad ka Damika Rani (62 & 65). Te kumta ka Attacker ka la pynkut da kaba ka la wan ha ka kyrdan basaw bad ka Lapalang ka la wan basan.
Hashwa ba kin ïakhun, ka Laitkor bad ka PFR ki la rung lypa sha ka quarter final bad kane ka jingïakhun mynta ka sngi ka dei ka jingrai mano ban ïoh lamkhmat ha kane ka group. Kawei pat ka kynhun kaba la ïoh rung na ki san tylli ha ka Group-A ki long ka Na Rympei FA (Ri-Bhoi District Sports Association) kaba la wan balai.
Ha ka Group-B ki don haduh hynriew tylli ki kynhun, katba kiba don ha ka ‘top four’ ki long ka Mawlum Tyrsad SC (Tyrsad Area SA) 13 poiñ, Jakrem SC (Mawkyrwat DSA) 12 poiñ, Bright Future SSCC (Pyndengumïong DSA) 7 poiñ bad ka Mawten SC (Mawkyrwat DSA) 4 poiñ.
Ki la don ar tylli ha ka Group C, ha kaba ka kynhun nongjop ka long ka Diengshynrum SC (East Jaintia Hills District Football Association) kaba la kamai 6 poiñ bad ban rung sha ka quarter final.
Na ka liang ka Meghalaya Football Association shen kan sa pynbna ïa ki tarik na ka bynta ka quarter final.
