Shillong, Risaw 27
U Symbud Myntri Rangbah ka Jylla u Bah Sniawbhalang Dhar u la ong ba mynshwa ha ka shnong Lapangap ha West Jaiñtia Hills kam ju don satia ka jingïakajia hynrei kine ki kynrum kynram bad huri hura ki dei kiba dang mih shen mynta.
U Bah Sniawbhalang u la ong ba ïa ka shnong Lapangap la pynhap noh ha ka thup ïakajia pud hadien bala sdang ïakren pynbeit pud hapdeng ka Sorkar Meghalaya bad Assam.
Haba kren sha ki lad pathai khubor, u Bah Sniawbhalang u la ong ba ka jinglong jingman mynta hapoh ka thaiñ Lapangap ka la jaijai bad ki nongrep ki la ïoh ban ot ïa u kba bad kyrmen ha kine ki sngi yn sa lah ban pyndep lut noh ïa ka jingot pura.
“Ka la wan ka jingjai jai ha Lapangap bad la khmih lynti ba lashai la shisngi kin sa lah ban pyndep noh ïa ka jingot ïa u kba namar ba ki Sorkar jong baroh artylli ki Jylla ki la dep ban ïakren halor ka jingpynneh ïa ka jingshong suk shong sain? ha ka thaiñ,” la ong u Symbud Myntri Rangbah.
Shuh shuh na ka liang jong u Symbud Myntri Rangbah u la pyntip ruh ba na ka liang ka Sorkar ka la dep ban shna ïa ka ktem pulit hapoh ka shnong Lapangap bad kumba long mynta da ki 30 ne 40 ngut ki pulit ruh ki la don ha kane ka shnong peit ba ki kam kin ïaid beit ïaid ryntih bad ban ai jingpahara ïa ki nongshong shnong.
U Bah Sniawbhalang u la ong ruh ba ki Regional Committee jong baroh artylli ki Jylla kila leh ïa kaba donkam bad shen kin sa lah ban pynbeit haba ïadei bad ka jingïakajia ha ka thaiñ Lapangap.
Halor ka jinglong jingman ha kiwei ki jaka ba don ka jingïakajia, u Symbud Myntri Rangbah u la ïathuh ba ha kaba ïadei bad ka Khanduli-Psiar bad Block I (kiba dei ki thup ba don jingïakajia), ka kaiphod hi ka don kaba la dep aiti bad ka don ki bym pat dep ruh bad ka jingpynkhreh hi ïa ka kaiphod ka dang ïaid halor kane ka kam.
“La thaw ïa ka komiti ban lah ban pynkhreh ïa ka kaiphod katkum ka jinglong jingman, khnang ban ïoh ban pynshong nongrim katkum ka kaiphod ba ngi ïoh,” u la ong.
