Shillong, Risaw 27
Ki Pulit jong ka thanad Mawlai ha ka miet jong ka sngi U Blei, kila ïoh ban bat noh ïa ki san ngut ki briew, kiba suba ba ki dei ki nong Bangladesh na ISBT ha Mawlai Mawïong.
Katkum ka khubor na u Superintendent of Police ka East Khasi Hills la ong ba ha ka 26 tarik mynta u bnai, hadien ka jingïoh ïa ka jingtip kaba bniah na ki bor syntiat, ba ki don ki suba nong Bangladesh kiba dang wan sha nongbah Shillong na Srinagar bad thmu ban hiar sha Bangladesh ha kawei ka kali tourist. Halor kane ka jingtip, ki pulit Special Cell bad SOT ki la pynlong ïa ka jingap kdong ha lad ISBT ha Mawlai Mawïong bad dei ha ka por kumba 8.42 mynmiet ba ki la ïoh bat noh ïa kawei ka kali tourist kaba don ïa u registration number ML05-1358 kaba la shong da ki san ngut ki briew.
La ong ba ha kane ka por haba la pynlong ka jingtohkit, kine ki briew kim shym la lah satia ban pyni ïa ki kot ki sla kiba donkam bad ha kaba ki la phla ba ki dei ki nong Bangladesh. Ki san ngut kiba la shah bat noh ki dei kiba la tip kyrteng kum u Md Alamgir Mia, 25 snem ka rta, ka Lelepa Begum, 40 snem ka rta, ka Musanat Jahana Khatoon, 35 snem ka rta, u Md Imammul Hassan, 18 snem ka rta bad u Md Fajid Bilal, 47 snem ka rta. Ïa kine baroh san ngut la kem noh bad la rah sha ka thanad ha Mawlai bad ka jingtohkit mynta kala ïaid shakhmat.
