Nongstoiñ, Risaw 27
Ka jingud jingnam bad jingangnud bad ka jingthrang jong kiba bun balang khamtam ki paidbah nongleit nongwan lyngba ka surok Nongstoiñ – Sohpian kaba long shisha ka surok kaba la buh ïa kiba bun ha ka jingma namar ka jingrit palat ka surok, kala pynlong ïa u MLA ka Nongstoiñ Bah Gabriel Wahlang ban pynsngew markhmat ha u Symbud Myntri Rangbah ka Jylla halor kane ka surok.
Ïa kane ka surok na ka liang jong u Bah Gabriel Wahlang u la pynpaw bad pynsngew markhmat ha u Bah Prestone Tynsong ha ka sngi pynkut ïa ka lympung ïalehkai 1st MLA Cup 2025 kaba la long ha ka 27 tarik u bnai Risaw da ka jingsakhi lang jong kiba bun ki paidbah.
Haba kren halor kane ka mat, kum u kongsan ha kane ka sngi, u Bah Prestone Tynsong u la ong ba ma u ruh u i sahnud bha namar haba u rung sha kane ka sor, ka surok kaba bit kaba biang hynrei na Sohpian sha Nongstoiñ ka dei ka single lane. Shuh shuh u Bah Prestone u la ong ba na ka liang jong ka Sorkar kala pynkhreh ïa ka jinglut jingsep bad shen yn sa ïoh ïa ka mang tyngka kaba 22 klur tam.
