Shillong, Risaw 27
Ka East Khasi Hills ka la bat biang ïa ka nam ‘Overall Champions’ ha ka liang ki shynrang bad kynthei jong ka lympung ïalehkai 31st State Karate Championship 2025, kaba la poi sha kaba kut ha ka sngi Saitjaiñ.
Ïa kane ka lympung ïalehkai kaba lai sngi kynthih kaba la long ha JN Indoor Stadium, Polo, la pynïaid da ka All Meghalaya Karate-Do Association (AMKA) bad la kyrshan lang da ka tnat ïalehkai jong ka Sorkar Jylla.
Te kumta ki la don haduh 512 ngut ki nongïalehkai kiba la wan shim bynta na ki phra tylli ki district, ha kaba ka la kiew na ki 456 ngut ha u snem ba la lah. Ki nongïalehkai ha la ki jong ki kyrdan ki la pyni ïa la ki sap ba kyrpang jong ki ha ka kumite (sparring) bad ka kata (choreographed movement demonstration).
Ka West Khasi Hills ka la wan ba-ar ha ka liang ki shynrang bad ka Ri-Bhoi ha ka liang ki kynthei.
Ïa ki khusnam sha kitei ki kynhun la sam da u Bah Sanbor Shullai, MLA kum u kongsan ha kaba la ïadon lang ki dkhot nongkitkam ka AMKA bad kiwei.
Haba ai jingkren ha katei ka sngi, u Bah Sanbor u la ai jingïaroh ïa ki samla namar ka jingaiti lut ha ka jingïalehkai ba ki la jied bad u la ai khublei ruh ïa ki kmie ki kpa kiba la kyrshan ïa ki ha ki jingpyrshang jong ki. Kum u nongïalehkai ha ki por ba la leit, u Bah Shullai u la pynpaw haduh katno ba u la kilanmet ïalade ha ki por ba u dang khynnah bad ha kito ki por ki la don tang katto katne ngut ki nongai jinghikai ha ka Jylla, nalor u (L) Bah Stephan Leong.
Mynta ka Karate ka la kiew shaphrang bad ka la long kaba paw ha ka Jylla, la pynpaw ka nongsiat khnam barim ka Jylla ka Kong Matsiewdor War Nongbri (IAS).
Ka kyrdan ïalehkai jong ka karate ka la nang kiew manla u snem bad u snem 2025 ruh um shym la pher. Da ka jingwan ka National Games 2027 ha Meghalaya, kan long ka jingmyntoi kaba khraw ïa ki nongïalehkai karate ba kin hap ban ïai trei shitom nangne shakhmat na ka bynta katei ka lympung.
Ïa ka nam Best Karateka la khur da ki khynnah ïalehkai na East Khasi Hills. Kine ki long u Ferrando Wanñiang (Junior Boys category), Ferdinand Samkupar Rani (Senior Men), ka Emika Deimaïa Myrthong (Junior Girls) bad ka Rebeka Nongspung (Senior Women).
