Shillong, Risaw 27
U Arpit Bhatewara, u la lah ban kam ïa uwei na ki mawjam ha ka jingim jong u hadien ba u la lah syndon ban kamai da ka ‘double century’ ne 200 run na ka bynta ka Meghalaya ha ka jingïakhun pyrshah ïa ka Sikkim ha ka Ranji Trophy 2025-26 (plate group), ha ka lah sngi U Blei ha madan ïalehkai kriket ka MCA, Polo.
U Arpit, u la lah ban pynpaw ïa ka jingtbit ha ka liang ka jingtied na ka bynta ka Meghalaya bad dei ma u uba la shah pynkhyllem khatduh hadien ba u la lah ban tied 200 ron, kaba la wan lang bad ki 25 tylli ki ‘four’ bad pynlong artad ïa ka Meghalaya ba kan kamai 405 ron na ka bynta ka pali wan tied ba nyngkong jong ka bad ban tam da 59 ron ïa ka Sikkim kaba la lah ban kamai 346 ron ha ka pali wan tied ba nyngkong jong ka.
Haba wan ban bteng ïa ka pali ban tied kaba ar, ka Sikkim ka la lah ban kamai 96 ron hadien ba ka la hap noh ar wiket, kaba ïa mynta ka lad ka dangplie ïa kine ki ar ki kynhun ba kin lah ban khur ïa ka jingjop, ne kaba lah ba kan poi sha ka jingïakhaid, jong ka sngi kaba kut ha ka sngi Ba-ar.
Haba wan bteng ïa ka pali, ka Meghalaya ka la lap ba duh noh ïa ka wiket u kapten jong ka u Kishan Lyngdoh hadien ba u la lah ban kamai 102 ron, kaba la jia tang ha ka bol kaba ar jong ka over ba nyngkong jong ka step, hadien kane bud pat sa wiket jong u Rahul Dalal.
Shipor ka la buh jingeh bha ïa u Arpit ha kaba u donkam ba un ïoh ïa ka jingkyrshan na sha shilliang, ha kaba wan mih madan u Aryan Borah, uba la ïai bteng ban ai ïa ka jingkyrshan kaba pura ïa u Arpit tad haduh ba un da lah ban kynjoh ïa ka thong jong ka jingkamai ïa ki 200 run.
Hynrei shwa ba un kynjoh ïa une u mawmer, u Arpit u la lait da ka said ha ka por ba u la kamai 199 ron, ha kaba u la pyrshang ba un mareh ïa kawei ka ron, kaba pynlong ïa u bad u Borah ba kin ïa sahkut lang ha ka juh ka liang, kaba hangne, u Borah, u la aiti noh ïalade na ka bynta u Arpit khnang ba un lah ban kynjoh ïa kane ka thong.
Na ka liang ki nongkawang bol ka Sikkim, ba la ïoh ban khur bun tylli ki wiket lyngba u Kranthi Kumar, uba la ïoh 6/86.
Haba wan pat ban sdang ïa ka pali tied kaba ar (second innings), kam shym la bam por ïa ka Sikkim ba kan lah ba kan tam shakhmat ïa ka thong ba la lamkhmat da ka Meghalaya, kampher wat hadien ba ki la lap ba duh noh ar wiket, ha ki kti u Akash Chaudhary (2/30).
Haduh ba kut jong ka sngi u Ashish Thapa (49 not out) bad K Sai Satwik (19 not out), ki dang ïai neh hapdeng ka madan ïakhun.
