Shillong, Risaw 27
U Bah P.F. Nongrang u ba long u Secretary Shnat Hima Nongwah Mawtamur Sohïong Lyngdohship u la wan ban pynshai paidbah halor ka jingsaphriang kawei ka ‘voice recording’, ban die ïa ka jaka na Umsaliang shaduh Umshru sha ki shipai BSF, ha ka dor ba T.700 klur tam eiei bad ka jaka kaba don 2 hajar acre.
Haba kren sha ki lad pathai khubor ha ka 27 Tarik u Risaw 2025, ha Shillong Press Club, u Bah P.F.Nongrang u la ïathuh shai ba katei ka ‘voice recording’ ba la saphriang ka dei ba la record hi da ma u, ha kapor ba u dang shong ban ïa kren kam bad u Bah Estansing Jana Nongbet Sirdarship Shnat Hima Nongwah Mawtamur Sohiong Lyngdohship bad u Bah Rastingwell L.Thabah Nongaibuit.
U Bah P.F.Nongrang u la ïathuh ba ka daw ba la pynlong ïa u ban record ka dei namar ba u Bah Estansing Jana Nongbet bad u Bah Rastingwell L.Thabah ki la thmu ban die ïa katei ka jaka sha ki shipai BSF haduh T.700 klur bad thmu ban ïa sam sop-sop mar T.5 klur bad kaba tam yn sa buh ha ka fund ka Hima.
Kumta u la ong ba um sngewtynnad halor kane ka jingthmu jong kitei ki ar ngut ki rangbah ban die ïa katei ka jaka bad ban ïa sam sop-sop mar T.5 klur bad ka long kaei-kaei ka bym lah ban pdiang.
“U Bah Estansing Jana Nongbet bad u Bah Rastingwell L.Thabah, ki la pyrshang ban pynbor bad pynngop ïa nga ban die beit ïa katei ka jaka na Umsaliang shaduh Umshru ha ka dor ba T.700 klur bad ban ïa sam mar T.5 klur, hynrei ngam treh ban leh kumta,” la ong u Bah P.F.Nongrang.
U Bah PF.Nongrang u la ong ruh ba namar ba um sngewïahap halor ka jingthmu jong ki, ban die ïa katei ka jaka, kumta ki la leh klet ruh ïa u bad hashwa kane ka la don ruh ka jingtyrwa pisa na kitei ki ar ngut lem bad ki riew rangbah na ka shnat Hima ban ïa don bynta lang ban ïa die ïa katei ka jaka ha ka dor ba T.700 klur.
U la ïathuh ruh ba dei ma u, ba la pynsaphriang ïa ka ‘voice recording’ kaba pynsngew ïa ka jingïakren jong kitei ki rangbah ban die jaka sha ki shipai.
Shuh shuh u la ong ba kitei ki rangbah ki la ong ban die ïa ka jaka sha ki shipai BSF ha ka dor ba T.700 klur bad kynnoh ruh ba ki thmu ban ïasam sop-sop mar T.5 klur bad ïa kaba tam yn buh ha ka fund jong ka Hima.
U Bah P.F.Nongrang u la kynnoh ruh ba kine ki rangbah kidei kiba ïalam bakla bad leh donbor hapoh ka Hima bad ki la byrngem ruh ba kino-kino ki bym kohnguh ïa kane, yn shu weng beit da ka jinglong Myntri hapoh ka shnat Hima Nongwah Mawtamur.
Nalor kata, u Bah P.F.Nongrang u la ong ruh ba ki khun ki hajar ka ri Khasi kim dei ban ngeit ïa kum kine, da kaba ong ba lada 5 hajar tyngka kawei ka jaka, nangno kin ïoh revenue bad ki Myntri ka shnat ki dei ban long shynrang bad kim dei ban shu ngeit katba ong kine.
Kumta u la bynrap da kaba ong, “Ngam shah halor kane bad ngan ïakhun beit ban pyntikna ba ka jaka jong ka Hima kan nym shah die duh”.
