Shillong, Risaw 27
U Myntri ka tnad pule-puthi, u Bah Lahkmen Rymbui ha ka Lah Sngi U Blei u la ong ba ka Sorkar Jylla ka la pynkhreh ban wanrah ïa ka rukom siew tulop kaba beit ba ryntih na bynta ki nonghikai ha ka Jylla hapoh u bnai Nohprah mynta u snem.
Haba jubab ïa ka jingkylli halor ka jinglong-jingman jong ka jingthmu ban shimti ïa 3,332 tylli ki skul SSA kiba la aiti ïa ki ‘No Objection Certificate’ (NOC) ban aiti ïa ka jingpynïaid jong ki sha ka Sorkar Jylla, u Bah Rymbui u la ïathuh ha ki nongthoh khubor ba ka Sorkar ka la ïaid shakhmat bad ka jingïamir jingmut bad ki nongïashim bynta bapher-bapher, kynthup ïa ki kynhun kiba mihkhmat ïa ki nongtrei SSA, kiba la dawa ïa ka rukom siew tulop kaba beit ba ryntih bad ka jingshngaiñ ha ka kam.
U la ong ba u Myntri Rangbah u la pdiang ïa ka jingdawa ban don ïa ka rukom siew tulop kaba beit ba ryntih, bad ka Sorkar ka dang khmih ha kano ka rukom ban pynïaid ban pyntreikam ïa ka.
“U Myntri Rangbah u la pdiang ba ka Sorkar kan wanrah ïa ka rukom siew tulop kaba beit ba ryntih hapoh u bnai Nohprah, 2025”, la ong u Bah Rymbui.
U Myntri u la bynrap, “Shisien ba ngi la jop ïa kane ka mat, baroh kiwei pat ki mat kin sa beit ryntih kumba ki dei ban long. Kumta, ka tnad kan sa khmih halor ki rukom treikam hynrei kumba ka long mynta, to ngin peit aïu ka Sorkar kan leh da kaba ïamir jingmut bad kiwei pat ki nongshim bynta hapoh kine ki ar bnai.”
U Myntri ka tnad pule-puthi u la ban jur ba ka Sorkar ka donkam ban pynïabiang ïa ki jingdon-jingem pisa jong ka ban kyntiew ïa ka imlang-sahlang, kynthup ïa ka pule-puthi, khlem da ïapeiñ ïa kiwei pat ki bynta.
“Ha kiei-kiei baroh, ka don ka jingktah ha ka liang ka pisa-tyngka. Kumta, ngi hap ban peit kano kaba ka Sorkar ka lah ban leh namar haba la ong ïa kata, ngi donkam ban pynbha ïa baroh ki bynta jong ka imlang-sahlang. Da kaba don ïa ka rukom siew tulop kaba beit ba ryntih, kam mut ba kiwei pat ki bynta kin shah ktah. Ngi hap ban pynïabiang lang ïa kiei-kiei baroh. Kumba ka long mynta, ka dang kloi palat ïa nga ban ong eiei,” u la ong haba bynrap “Ngin hap ban ïakren bad baroh ki nongshim bynta bad kano-kano ka jingktah kaba don ha ka liang ka pisa-tyngka, ngin ïasam lang namarba ka Sorkar kam dei na ka bynta jong ngi, ka Sorkar ka dei na ka bynta ki paidbah hynrei ngi hap ban pynïabiang lang ïa baroh.”
“Kawei kaba nga sngewkmen bha ka long ba ha man la ka jingïalang bad man la ka kynhun, baroh ki la wan shakhmat ha ryngkat ka jingmut kaba shai bad kaba kloi ban pdiang. Ki tip ba ki don ki jingeh, ki tip ba ki don ki jingtynjuh hynrei ki wan da ka jingmut kaba pdiang. To ngin kyrmen ba ka Sorkar ruh kan ïaid da ka jingmut kaba pdiang khnang ba ngin lah ban pynïasoh lang ïa ka rukom pyrkhat jong ngi ban peit ba ki jingeh kiba ngi ïakynduh man la u snem, ngin lah ban pynbeit noh kloi katba lah,” u la bynrap shuh-shuh.
Haba kylli hato katei ka sienjam ka dei shi bynta na ka jingthmu ka Sorkar ban pyntreikam ïa ka Meghalaya Education Grant (MEG), u Bah Rymbui u la ong ba kane ka dei shi bynta jong ki jingpyrshang ba ïai bteng jong ka Sorkar ban pynthymmai ïa ka jinglong-jingman ka pule-puthi, ïa kaba la kular da u Myntri Rangbah ka Jylla ha u snem 2018.
Ka Sorkar ka thmu ruh ban pynbeit ryntih ïa ka tnad pule-puthi, da kaba don tang ar tylli ki jait skul – Sorkar bad kiba ïoh jingïarap na ka Sorkar, nalor ki skul shimet.
U Myntri u la pynpaw ka jingkyrmen skhem ba ka Sorkar bad ki nongshim bynta ki lah ban ïatreilang ban weng ïa ki jingeh kiba ïakynduh da ka tnad pule-puthi.
Katkum ka jingong jong u, ka jingpynkylla kaba dang ïaid shakhmat ka thmu ban weng ïa ki jingeh bapher-bapher kiba la pynithuh ha ka liang ka pule-puthi ha kine ki san haduh hynñiew snem ba la leit.
