Shillong, Risaw 28
Ka Meghalaya Police F.T ka la jam sha ka kyrdan ba hakhlieh ha ka SSA 1st Division Football League 2025, hadien ba ka la pynliem noh ïa ka Nongkrem SC da 2-1 kol ha ka sngi Ba-ar ha SSA Stadium, Polo.
Kane ka nam jop ka la wan urlong lyngba ki kol ba la thep da u Rapborlang Marweiñ (10) bad u Everes-tarly Rynjah (12), hynrei ka Nongkrem ka la pynphai kylla shi kol lyngba u Vincent Kharsyntiew (16).
Lyngba kane ka jingjop kaba hynriew, ka MLP ka la kamai 18 poiñ bad ban tam da 3 poiñ ïa ka Nongkseh, kaba la hiar sha ka kyrdan ba-ar, katba ka Nongkrem ka dangsah ha ka kyrdan ba san bad 7 poiñ.
Haba phai sha kawei pat ka jingïakhun kaba la long kham hashwa, ka Nongthymmai SC ka la pynliem noh ïa ka Nongrah SC da 2-0 kol.
Ha kane ka jingïakhun ka Nongthymmai ka la pynkhih jar nyngkong ha ka kylla step lyngba u Nathan B Majaw (16) bad ïa ka kol kaba ar ka la thep ha ka kylla miet lyngba u Donboklang Majaw (66) na ka bynta ban khur ïa ka jingjop kaba lai ha kane ka lympung.
Te kumta ka Nongthymmai ka dangsah ha ka kyrdan balai bad kamai 11 poiñ na ki san sien ïakhun, katba ka Nongrah ka la dangsah ha ka kyrdan ba hynñiew bad 4 poiñ. Ka jingïalehkai ha ka sngi Balang kan long hapdeng ka Ryntih SC pyrshah ïa ka Mawtawar SC ha ka por 1:15 mynsngi.
