Nongpoh, Risaw 28
Uwei u khynnah rit uba dang 14 snem ka rta na ka shnong Quinine ha Ri Bhoi District, u la pynkut jubor noh ïa la ka jong ka jingim da kaba sdien phasi ha kawei khlaw kaba dang hap hapoh u pud u sam jong ka shnong ba marjan, ka Umsawnongkharai.
Katkum ka tyllong khubor ba la ïohlum, utei u khynnah u dei uba la jah rngai na la ïing naduh ka por 10 baje jong ka miet sngi Nyngkong bad na ka liang ki bahaïing ki la pyrshang ban wad ïa u ha kylleng ki jaka, hynrei ki khlem lap satia bad dei ha ka step jong ka sngi Ba-ar ki la leit ruh ban ujor noh da ka ejahar ha thanad Nongpoh.
La ïathuh ba ïa ka met jong utei u khynnah rit, la lap nyngkong da uwei pat u khynnah uba dang thmu ban leit pom siej ha katei ka khlaw. Tang mar ïa ïohi ïa ka met kaba la sdien halor u dieng, utei u khynnah u la phet krad ïalade da ka jingtieng bad pyntip noh sha ki briew shnong, kiba la pyntip pat sha ki pulit.
Hadien ka jingwanpoi jong ki pulit lem bad ka kynhun jong ki Forensic Crime Scene Unit, la pynhiar noh ïa ka met jong utei u khynnah rit na utei u dieng bad la pynkit pat sha Nongpoh Civil Hospital na ka bynta ban pyndep ïa ka post-mortem. Ki bahaïing hasem namar ba kim don jingsuba ne tharai sniew satia halor katei ka jingjia, kila kyntait ban leh ïa la post-mortem.
