Shillong, Risaw 28
Ka kynhun ïalehkai jong ka Sikkim ka la lah ban ïalehkai bha na ka bynta ban pynïakhaid (draw) ha ka lympung ïalehkai Ranji Trophy 2025-26 (plate group) pyrshah ïa ka Meghalaya ha ka sngi Ba-ar ha madan ïalehkai ka MCA, Polo.
Ha ka jingwan ban bteng ïa ka pali tied kaba ar (second innings), na ka 96 ron na ka bynta 2 wiket, ka Sikkim ka la bteng ban ïalehkai bha bad hadien ba ka la lah ban kamai 303 ron hadien ba ka la hap noh 7 wiket.
Kumban shu pynkynmaw ba ha ka pali wan tied kaba nyngkong (first innings) ka Sikkim ka la lah ba kan kamai 346 ron hadien ba ka la hap noh baroh ki wiket ki jong ka, hadien kane, ka Megha-laya ha ka pali jong ka, ka la lah ba kan kamai 405 ron bad ban tam kylla ïa ka Sikkim bad kane ka pynlong syndon ïa ka Megha-laya ba kan da lah ba kan ïoh khur 3 point katba ka Sikkim ka la ïoh 1 point.
Ka nam tam napdeng ki nongtied ka Sikkim dei u Akash Thapa uba la lah ban kamai 117 ron ba la wan na ki 189 bol, kaba la wan hadien ba u la lah ban bteng ïa la ka pali jong u hadien ba u la lah shwa ban kamai 49 ron bad ban ïai bteng ban kynjoh sha ka spah ron (century), kaba dei artad ka sien kaba saw ha ka jingim ïalehkai kriket (first class) jong u bad u la shah pynkhyllem noh ha ki kti jong u Ajay Duhan.
Na ka liang ki nongka-wang bol ka Meghalaya u Akash Chaudhary u la ïoh ban khur sa shi wiket hynne ka sngi bad kaba pynlong ïa u ban khur 3/56, kaba la wan hadien ka pali ba nyngkong ba u la ïoh 5/85.
Kum shi bynta ban pyrto ïa ki ar tylli ki spah run (double century), ka nam Player of the Match ka leit sha u rangïalehkai ka Meghalaya u Arpit Bhatewara.
Hadien kane ka jingïakhun, ka Meghalaya kan khreh ba kan mih na la ïing ban leit ïakhun pyrshah ïa ka Bihar ka ban long ha Patna naduh 1 tarik u Naiwieng.
