Nongpoh, Risaw 28
Ki pulit ka Ri Bhoi District ha ka shiteng synñia jong ka sngi Nyngkong, ki la ïoh ban kurup haduh 206 kilo tam u Ganja na kawei ka kali Maruti S-Presso kaba don ïa u registration number AS01-EG-7234 katba ki dang pynlong ïa ka jingtalasi kali ha ka surokbah National Highway 6 hakhmat jong ka thanad Nongpoh.
Katkum ka khubor ba la ïoh lum, la ïathuh ba katei ka kali ka dei kaba dang thmu ban hiar sha nongbah Guwahati na Shillong bad ha ka por kumba 12:40 baje mynstep, katei ka kali tang mar ïa poi ha ka jaka talasi kali ki pulit ha Nongpoh, u nongñiah lem bad uwei pat u nongbud, ki la hiar sted bad phet krad ïalade.
Ha ka jingtalasi ïa katei ka kali, ki pulit ki la lap ïa kumba 28 tylli ki song kiba la thep ïa u Ganja, kiba don ïa ka jingkhia kaba 206.054 kilo baroh. Halor kane ka jingjia, na ka liang ki pulit kila register da ka case katkum ki kyndon jong ka aiñ Narcotic Drugs and Psychotropic Substances (NDPS), 1985 bad ka jingthwet ban lap ïa ki briew kiba la phet bad kiba donkti halor kane ka kam, ka dang ïaid shakhmat.
