Turkey, Risaw:
U jumai uba khlaiñbor la ong ba u la pynkhynñiuh ia ka thaiñ West jong ka Turkey ha ka Sngi Nyngkong, ha kaba katto katne ki iingmala ki la orpait bad julor khyndiat- khynsoit, hynrei la ong ba ym shym la ioh jingtip pat ban don kiba ngat ne mynsaw ha une u jumai ha katei ka sngi.
La ong ba utei u jumai u don ia ka jingkhlaiñ kaba 6.1 Magnitude bad ka jaka ba utei u jumai u kham ñion eh ka dei ha ka shnong Sindirgi hapoh ka thaiñ Balikesir, katkum ki kaiphod na ka Disaster & Emergency Management Agency bad la ong ba utei u jumai u la khynñiuh ha ka por kumba 10:48 jong katei ka miet Sngi Nyngkong.
Ia utei u jumai, la iohsngew ruh na ka nongbah Istanbul bad na kiwei de ki thaiñ ba marjan jong ka Bursa, Manisa bad Izmir, la iathuh ka tnat pathai khubor jong ka Haberturk.
Haba iadei bad kane, la ong ba ka Singirgi ruh ha u Nailar, ka la shah lynshop ha u jumai uba 6.1 magnitude ka jingkhlaiñ, ha kaba uwei u briew u la khlad noh syndon bad katto- katne ngut pat ki la mynsaw na utei u jumai ha katei ka sien. Naduh katei ka sien, ka thaiñ Balikesir ka la sakhi ia kiba bun tylli ki jingkhynñiuh jumai kiba rit bad ki bym da khlaiñ bor haduh katta.
Namar la ong ba ka Turkey ka don ha ka bynta jong ka sla khyndew, kaba long kloi bha ban shah ktah ha ki jumai bad kiba lah ruh ban jia khah-khah, lada ianujor bad kiwei pat ki bynta jong ka pyrthei.
Ha u snem 2023, u jumai uba 7.8 Magnitude u la pynkhynñiuh ia ka Turkey, ha kaba 53,000 tam ki paidbah nongshong shnong katei ka ri ki la duh noh ia la ka jingim bad da ki spah hajar tylli ki iingmala ki la khyllem bad um lut ha utei u jumai, ha ki 11 tylli ki thaiñ South bad Southeast jong katei ka ri. Kumjuh ruh 6,000 tam ki la khlad na ki bynta ba marjan jong ka North Syria ha katei ka por.
