Shillong, Risaw 28
Ka Nongrah Presbyterian Secondary School ha ka 28 tarik u Risaw 2025, ka la pynhap pyrda noh ïa ka jingrakhe dap 100 snem jong ka, ha ka ban ai ka jingshakri ha ka pule-puthi sha ki khynnah jong katei ka dong ka thaiñ, ha ka jingïalang kaba la pynlong ha madan jong katei hi ka skul.
Ïa kane ka skul la sdang ban seng naduh u snem 1925 bad ka la dap la 100 snem kynthih ha ka ban ai jingshakri ïa ki khynnah skul.
Ha kane ka jingïalang pynhap pyrda, la wan ban ïashim bynta da u Dr.Ricky AJ Syngkon, u MP ka Lok Sabha na Shillong Parliamentary Constituency, u ba long kum u Kongsan, ha ryngkat ka jingïadonlang u Bah Winston Tony Lyngdoh, Chief Execu-tive Member (CEM) ka KHADC kum u Symbud Kongsan, Tbn. FJ Mairom, Chairman ka Centenary Celebration Committee, ka Kong BT.Jyrwa, Principal ka skul, u Rev.Dominos Sun, Chairman ka Jaïaw District, ki nonghikai, ki kmie ki kpa, ki khynnah pule, nalor kiwei-kiwei de.
Ha kane ka sngi, la ïoh ruh ban pyllait paidbah ïa ka souvenir jong katei ka skul da ka Kong Aitinora Kharkongor bad la pyniphuh iphieng ïa katei ka jingïalang da ki jingrwai bad jingtem na ki khynnah pule katei ka skul.
Haba ai jingkren ha kane ka sngi, u Dr. Ricky AJ Syngkon, u la ai khublei ïa ki longshuwa kiba la seng ïa kane ka skul shispah snem mynshwa, kaba long ruh ha ka por ba ka pule-puthi ka dang long kaei-kaei kaba ym lah ban mutdur.
U la ong ruh ba ka pule-puthi ha kine ki sngi ka long kaba khraw bad ka dei ka atiar kaba lah ban rat dyngkhong ïa ka jingbiej jingthem, ïa ka jingduk bad khamtam lei-lei haba pynshong nongrim ha ka hok bad ka jingshem phang, kan plie ïa kiba bun ki lad ki lynti bad ka lawei ba phyrnai.
“Shispah snem mynshwa nga tharai kim pat phohsniew ha kaba ïadei bad ka pule-puthi bad ka long kaei-kaei ka bym lah ban mutdur,” la ong u Dr.Ricky.
U la pynkynmaw ruh ba ha kito ki por ba mynshwa ka surok ruh kam pat long kaba biang, wat ka surok rong ruh kam pat don, “Kumta ngi dei ban ainguh shisha ïa kito ki mynbarim bad kito ki nongseng ïa kane ka skul kiba don ïa ka jingïohi jngai ban seng ïa kane ka skul hapdeng ka khlaw bah. Mano ba lah ban mutdur ban don ka skul bad i jingshai hapdeng kaba dum,” u la bynrap.
Na ka liang u Bah Winston Tony Lyngdoh, u la pynkynmaw ïa ki por ba u don ha ka kam Mission ha shwa ba un rung sha ka kam saiñ pyrthei.
U la kyntu ïa ki nonghikai ba haba ki shimti ïa ki khynnah kidei ban don ryngkat bad ki ha ki jaka pule, ki dei ban peit ïa ki da ka jingsngewlem ym tang ban pyndep ïa ka kamram na ka bynta ka kam jong ki.
