Shillong, Risaw 28
U Myntri Rangbah ka Jylla, u Conrad K. Sangma, ha ka Sngi Ba-ar u la plie ïa ka Mini Secretariat bad ka Circuit House kiba la shna thymmai ha Pynursla, East Khasi Hills District.
Haba kren ha ka jingïalang, u Myntri Rangbah ka Jylla u la ai jingïaroh halor ka jingpyndep ïa kine ki ar tylli ki projek ba kongsan, da kaba kdew ïa ki kum ka jingïohi jngai jong ka Sorkar na ka bynta ka synshar-khadar kaba treikam bad kaba ïasam lang ïa ka bor, lem bad ka jingshakri paidbah kaba kham bha.
“Ka Mini Secretariat bad ka Circuit House ha Pynursla ki pyni ïa ka jingangnud jong ka Sorkar jong ngi ban kyntiew ïa ka roi ka par kaba ïaryngkat lang bad ka jingïasam lang ïa ka bor pynïaid ha ka synshar khadar,” u la ong.
“Ngi kwah ïa ka ‘One-stop System’ ha kaba ki nongshong shnong kin ym donkam shuh ban mareh na kawei ka ophis sha kawei pat na ka bynta ki jingshakri ba kongsan. Ka thong jong ngi ka long kaba suk – ka synshar-khadar kaba paka bad ka jingai jingshakri hakhmat jingkhang jong ki paidbah.”
Haba shim ïa ki kyntien jong u nongthoh Shiv Khera ban leh ïa ki kam ha ka rukom kaba kham pher, u la ong, “Ha ka por ba ngi sdang ha u snem 2018, ka jingpyndonkam ïa ka MGNREGS ka long tang hapoh T. 500 klur. Mynta, ka la kynjoh jan T. 2,000 klur – ym namar ki skhim thymmai, hynrei namarba ngi pyntrei ïa ki kam ha kawei pat ka rukom. Kumjuh, hapoh ka Pradhan Mantri Awas Yojana, ha kaba mynshuwa ngi la ïoh kumba 4,000 haduh 5,000 tylli ki ïing ha ka shisnem, mynta ngi la kynjoh haduh 1.5 lak tylli ki ïing ha ka shi snem.”
Haba batai ïa ka jingmut kaba don ha lyndet jong ka Mini Secretariat, u Myntri Rangbah ka Jylla u la ong, “Ka jingmut ka long kaba suk. Ngi kwah ïa ka jaka treikam kaba tang kawei – ka rukom treikam ha kaba ki briew kim donkam ban leit na kawei ka ophis sha kawei pat. Baroh ki tnad treikam ha ka kyrdan Sub-Division kin treikam hapoh kawei ka tnum ban pynbiang ïa ki jingshakri ha ka rukom kaba kham sted bad ba paka. Ka jingthmu jong nga ka long ba ha ki por ban wan, u briew u lah ban aiti ïa ki kot ki sla jong u ha ka ophis kaba jan tam bad wan biang hadien shi taïew ne shiphew sngi ban shim pat ïa ki, ha ka jaka ban leit shaduh DC ophis.”
U la pynpaw ka jingsngewnguh ïa ki paidbah nongshong shnong kiba la ai ka jingïatreilang, khamtam eh ïa ka Raid Shabong kaba la ai sngewbha ïa ka jaka na ka bynta katei ka projek.
“Kane kam dei tang ka jaka – ka dei ka khubor sha ka Jylla baroh kawei ba ki shnong ki thaw bad ka Sorkar ki lah ban ïatreilang na ka bynta ka jingbha kaba kham khraw. Kaei kaba phi la leh mynta ka sngi kan sah jingkynmaw ha ka histori kum ka jingai sngewbha sha ki briew jong phi – kawei ka ban shakri ïa ki bun pateng ban wan.”
U la ai khublei ruh ïa ka jingpyrshang jong u Symbud Myntri Rangbah ka Jylla, Bah Prestone Tynsong da kaba ong, “Hapoh ka jingïalam jong u Symbud Myntri Rangbah jong ngi, ka jingaiti jong u ba man ka por ïa ka thaiñ bad ki briew jong u ka la pynlong ïa kane ka projek kaba lah ban urlong. Ka jingpyndep bad ka jingbha jong ka jingpyntrei ïa ka kam ka long kaba paka shi kat dei.”
“Ngi dang pyrkhat wat ban shim ïa kane ka rukom shna na ka bynta baroh ki Mini Secretariat ha kylleng ka Jylla khnang ba ki briew kin ithuh mardor ïa ki kum ki jaka jong ka synshar-khadar bad ka jingshakri,” u la bynrap.
Ha kawei ka liang, u Symbud Myntri Rangbah ka Jylla, Bah Prestone Tynsong, ha ka jingkren jong u, u la pynpaw ka jingsngewnguh ïa u Myntri Rangbah ka Jylla uba la buh hakhmat eh ïa ka Pynursla ha ka ‘agenda’ pynroi jong ka Jylla bad u la ïaroh ruh ïa ka jingïatreilang kaba la pynlong ïa kane ka projek kaba jop.
“Kane kan ngam ha ka histori jong ka Pynursla Civil Sub-Division”, u la ong.
Ha kane ka sngi, u Myntri Rangbah u la ïashim bynta ruh ha ka jingïalang pynhap pyrda ha ka jingrakhe Jubili Rupa jong ka St. Anthony’s Higher Secondary School, Pynursla bad plie ruh ïa ka Block Integrated Development Complex (BIDC) ba dang shna thymmai ha Pynursla C&RD Block.
