Shillong, Risaw 28
U Myntri ka tnad ka koit ka khiah ka Jylla, u Bah Wailadmiki Shylla ha ka Sngi Ba-ar u la pynbna ba ki klas ha ka Shillong Medical College ki la sdang, ha kaba la pyndap ruh haduh 50 tylli ki jaka.
Ka kolej ka la pyndep ruh ïa ki jingdonkam ha ka liang ki nonghikai – ka kyndon kaba kongsan ha ka ban ïoh ïa ka jingbit na ka National Medical Commission (NMC).
U Bah Wailad u la kubur ba ka jingduna ki nonghikai ka dei ka jingeh kaba ki Medical College kiba thymmai ki ju ïakynduh, hynrei u la pynpaw ka jingsngewnguh ba ka Shillong Medical College ka la lah ban pyndep ïa ki kyndon jong ka NMC.
“Hooid, na ka bynta ka kolej (Medical) bathymmai, kata ka don beit, hynrei ha ka jingshisha, ngi long kiba donbok shibun namarba ngi la lah ban pyndep ïa ki kyndon na ka bynta ban ïoh jingbit na ka NMC,” u la ong ha ki nongthoh khubor.
U Myntri u la ong ruh ba ka jingdon ki nonghikai ha kolej ïa mynta ka long kaba bit ka biang, ha kaba bun na ki, ki dei kiba na Meghalaya.
U la pynpaw ka jingkyrmen ba kine ki nonghikai kin long kiba shimkhia ban pyntikna ïa ka jingjop jong ka kolej. Nalor kane, la pyrshang ban pynrung shuh-shuh ïa ki nonghikai na kiwei pat ki Jylla ban pyndap shuh ïa ka kynhun kaba la don lypa.
Haba ïadei bad ki jingtei, u Bah Wailad u la ïathuh ba mynta ka kolej ka treikam na ki ïingmala kiba rim, hynrei la khot ‘tender’ ban tei ïa ki jingtei kiba thymmai.
Ka Sorkar ka dang wad ki lad ki lynti ban khot ïa u Myntri Rangbahduh lane ïa u Myntri ka tnad ka koit ka khiah ka Sorkar Pdeng ban plie ïa ka Shillong Medical College.
“Ngi dang treikam hi na ki ïingmala kiba rim, hynrei kaba bun ka ‘tender’ ka la ïaid shakhmat na ka bynta ki jingtei bapher-bapher. Mynta hi, ngi dang don ha Pasteur Hills. Ngi la ïakren bad u Myntri Rangbah, ngin pyrshang ban khot ïa u Myntri Rangbahduh, hynrei lada u Myntri Rangbahduh um lah ban wan, ngi lah ban khot ïa u Myntri ka tnad ka Koit ka Khiah ka Sorkar Pdeng,” la bynrap u Bah Wailad.
