Shillong, Risaw 28
U Zenith Sangma, uba dei u MLA barim jong ka All India Trinamool Congress (AITC) na Rangsakona bad uba dei u para jong u Myntri Rangbah barim ka Jylla u Dr. Mukul Sangma, u la iehnoh ïa ka jinglong dkhot na ka AITC bad ban pynïasoh biang ïalade sha ka Indian National Congress (INC).
Ha ka shithi sha u State President jong ka AITC, Bah Charles Pyngrope ba la aiti ha ka sngi Ba-ar, u Zenith Sangma u la ong ba u la rai ban iehnoh ïa ka kam Vice President jong ka Meghalaya Trinamool Congress bad ruh kum u dkhot jong ka seng.
U la kdew ïa ka jingdonkam ban sdang ïa ka lynnong kaba thymmai bad ka jingangnud bad jingkwah ka jong u ban shakri na ka bynta ki paidbah.
“Mynta ka sngi, nga sngew ba ka por ka dei kaba biang na ka bynta jong nga ban ïaid shakhmat bad sdang ïa ka lynnong kaba thymmai – bad ka lynti kaba kham ïajan bad ka jingangnud jong nga na ka bynta ki paidbah kiba nga shakri,” ong u Zenith ha ka shithi.
U State President ka AITC u la pdiang ïa kane ka shithi iehnoh kam jong u Zenith.
Ka All India Congress Committee (AICC) ka la mynjur ïa ka jingpynïasoh biang jong u Zenith, da ka shithi na u AICC In-charge ka Meghalaya Dr. A Chellakumar ba pyntip ïa u President ka MPCC Bah Vincent H Pala ïa kane ka rai.
“Kane ka long kum ka jingpyntip sha phi ba u President ka Congress u la ai jingmynjur ïa ka jingtyrwa ban wan ïasoh biang u Zenith Sangma sha ka Indian National Congress,” ong u Dr Chellakumar.
Ka jingleit phai u Zenith sha ka Congress la i kum ka sienjam ban pynim pat ïa kane ka seng ha ri-lum Garo, hashuwa ka ilekshon MLA 2028.
