Shillong, Risaw 28
Ka lympung ïalehkai Meghalaya State Judo Championship 2025-2026 ba la pynlong da ka Megha -laya Judo Association (MJA) ka la mih ki kynrum kynram na ka daw ka jingailad katei ka synjuk ban wan ïashim bynta lang ki nongïalehkai kiba nabar jylla.
Kat kum ka jingïathuh da ki nongïalehkai la ong ba katei ka synjuk ka la ailad ïa ki nongïalehkai kiba nabar jylla kiba la don hapoh ka kynhun shipai jong ka Assam Rifles ba kin ïashim bynta lang ha kane ka lympung khnang ba kin ïoh ban mihkhmat ïa ka Jylla. Ha kajuh ka por ki la dawa ïa u General Secretary ka MJA u Deepak Malick ba un hiar shuki noh namar u la bat ïa katei ka kam haduh 25 snem kynthih.
Ïa kane ka lympung la sdang naduh ka lah sngi U Blei bad ban pynkut ha ka sngi Ba-ar, la pynlong ha SAI STC, Multipurpose Indoor Hall kaba don ha NEHU, Shillong bad la kyrshan lang da ka tnat ïalehkai ka Sorkar Jylla.
Kane ka jingmih ki kynrum kynram ka la wan mih paw hadien ba ki 68 ngut ki khynnah ki la mih shakhmat ban pynpaw ka jingpyrshah halor ka jingleh donbor katei ka synjuk da kaba ki la kynnoh halor ka jingthmu ban khanglad syndon ïa ki nongïalehkai ka Jylla khamtam leilei haba ka Megha-laya kan pdiang ban pynlong ïa ka 39th National Games ka ban long ha u 2027.
Ïa katei ka jingpyrshah jong ki khynnah la kyrshan lang da u Balamphang S. Kharkongor uba la long teng u nonghikai Judo bad uba bat ruh mynta kum u International Coach B Licence jong ka Meghalaya Kurash Association ha ryngkat ki dkhot ka FJKJGP Shillong City hapoh ka jingïalam u Sports Secretary u Bah Alan Kharkongor bad u Bah Angelus Jasaiñ.
Kane ka sngi pynkut ïa katei ka lympung, ka jia ryngkhat ba ka dei ka sngi rakhe ïa ka World Judo Day, te kumta ki shi kynhun ki nongïalehkai jong ka Assam Rifles, ki la kwah ban ïashim bynta ha ka jingrakhe ba kin pyni ïa ki sap ïalehkai ne ka ‘demonstration’.
Pynban, ha ka por ba lum ïa ki kyrteng jong ki khynnah kiba dei hok shisha na kane ka Jylla ban ïakhun ha kane ka lympung, ki kyndit kumba ïuh tdong bseiñ ba ka kyrteng jong ki ka mih da kaba kin hap ban ïakhun pyrshah ïa ki nongïalehkai ka Assam Rifles.
Te kumta katei ka kynhun seng jong ka FKJGP ka la lum lang ïa baroh ki khynnah ïalehkai ka Jylla, bad da kawei ka sur, ki la ïeng ban shu dawa noh beit ba u Secretary ba mynta u dei ban hiar shuki noh mardor, da kaba ki la ïa soi paidbah (signature campaign), kum ka dak ban sakhi lang ïa kane ka jingdawa.
Na ka liang u Bah John Lyngdoh, Vice President ka Meghalaya Judo Association, u ïathuh ba mynta ka sngi ka dei ka sngi ban rakhe ïa ka World Judo Day, ha kaba ka jingkhot ïa ka Assam Rifles, ka long ban rakhe ïa kane ka sngi, pynban ka jingbakla pat ka long na ki bor pynïaid ka ‘technical committee’ ka la pynrung ïa ki kyrteng ki nongïalehkai ka Assam Rifles bad ban da thew ruh ïa ka jingkhia da ka jingthmu ban pynïalehkai ïa ki.
Marsien ïoh jingtip ïa kane, u Bah John u la pyntip ba la phah pynsangeh noh bad ha kum kane ka por la lap ba wan poi noh u Bah Balamphang lem bad ki dkhot ka FKJGP Shillong City, hynrei u Bah John u la pynshai ba marsien lap ïa kane, mar mar ki la pynsangeh bad khlem ailad shuh ïa ki nongïalehkai ka Assam Rifles ba kin ïalehkai, hynrei la shah ïa ki tang ba kin pyndep ïa ka ‘demonstration’ na bynta ka World Judo Day, ha kaba la weng ruh syndon ïa kitei ki nongïalehkai ha ka por ba ki la rung sha ka rynsan ïakhun.
Shuh shuh u Bah John u la pyntip ba ha ka taïew ban wan, ka MJA kan sa shong jingïalang (annual general body meeting) ha kaba yn shim ïa ka rai jong ki dkhot bad kumjuh ki khynnah bad lada ka jingdawa ka long ban weng ïa u General Secretary yn hap ban shim bad ban thung noh da uwei ne lada ki khynnah ki kwah ban pynthymmai lut ïa baroh ki dkhot bad ïa kata ruh yn leh.
