Nongpoh, Risaw 28
Hadien ka jingtohkit bad ka jingbuddien kaba jur, ki pulit jong ka Ri Bhoi District ki la lah ban lapksai noh ïa ka kam khaïi briew kaba heh bha ha ki Jylla ka thaiñ shatei lam-mihngi bad ïoh ban pyllait im ïa kawei ka samla bad ïoh kem ruh ïa lai ngut ki briew kiba donkti, kiba treikam ha ka Jylla Meghalaya, Assam, Tripura bad Rajasthan.
Katkum ka tyllong khubor na ki pulit, la ïathuh ba ha ka 11 tarik u bnai Jylliew, 2025, ka la don ka jingujor ejahar halor ka jingjah rngai jong kawei ka samla na ki thaiñ Byrnihat bad ïa kane la register case ha Nongpoh Women Police Station katkum ka Case No. 25(06)2025 hapoh ki kyndon 140(2)/3(5)/61(2)/87 Bharatiya Nyaya Sanhita (BNS) ryngkat bad ki kyndon 5(1)(A) jong ka aiñ Immoral Trafficking (Prevention).
La ïathuh ruh ba ïa ka jingtohkit ïa kane ka jingjia, nyngkong la shimti da ka WO/UBI Jessica A Sangma bad hadien ka jingshah kynriah kam ka jong ka, ïa ka jingtohkit la aiti noh ha u UBI Michael R Marak.
Ha ka jingtohkit jong ki pulit, la lap ba katei ka samla kaba la jah rngai na Byrnihat, ka la shah set ha kawei ka jaka ha ka Jylla Rajasthan bad kala ïoh ban lait phet na katei ka jaka bad lyngba ka jingïarap jong ki pulit ka Jylla Rajasthan, katei ka samla kala ïoh ban wanphai biang sha ka Jylla Meghalaya.
Ha ka jingkylli jong ki pulit, katei ka samla kala phla ba ka la ïalong paralok bad uwei u briew na ka Jylla Assam lyngba ka Facebook, uba la pynbiej pat ïa ka ban leit sha Delhi bad Rajasthan na ka bynta ban shong kurim. Tang mar ïa poi sha kitei ki jaka, katei ka samla, kala shah pynshong kurim jubor ha uwei u briew u bym ithuh, ha ka dor kaba T.3 lak.
Na ka liang ki pulit, kiba la shimkhia ïa kane ka kam, hadien ka jingtohkit kaba jur, ki la ïoh kem noh ïa u Rajesh Hinge, 31 snem ka rta, khun jong u Ratan Singha na ka shnong Kumarghat, Betchera jong ka Jylla Tripura ha ka 19 tarik u Risaw, 2025 bad ha ka 21 tarik jong u juh u bnai, ki la ïoh ban kem pat sa ïa u Md. Khalil Ali, 31 snem ka rta, khun jong u (L) Mohanur Ali, na ka shnong Karabari, Boko, Kamrup jong ka Jylla Assam, na Jhalukbari.
Na ka jingtohkit ïa kitei ki ar ngut kiba la ïoh kem, ki pulit ki la ïoh jingtip ruh ïa kawei ka longkmie kaba donkti halor kane ka kam khaïi briew, kaba la tip kyrteng kum ka Mobika, khun jong u Naresh Kumar na ka shnong Kari, Ward No 9, Nawalgarh, Jhunjhunu District jong ka Jylla Rajasthan. Ïa kane ka longkmie, ki pulit ki la ïoh ban kem na Kamakhya Railway Station myn ha ka 26 tarik mynta u bnai.
Ka tyllong khubor na ki pulit ka ïathuh ba kine ki briew kiba la shah kem, ki dei kiba la donkti ha kane ka kam khaïi briew la kumba ar snem eiei bad ba ki la dep ban die kumba san ngut ki khynnah kynthei na Boko, Assam bad kawei na ka Jylla Tripura. Katba ka jingtohkit ïa kitei ki lai ngut, ka dang ïaid shakhmat, ki pulit ki don jingkyrmen ruh ban ïoh kem shuh sa ïa kiwei de kiba donkti halor kane ka kam.
Ki pulit ki la ïathuh ba kane ka jingjia, ka pynpaw ïa ka jingkharoi ki kam sniew lyngba ka internet, ha kaba ki runar khaïi briew, ki ju pyndonkam lyngba ka Facebook,, Instagram bad kiwei-kiwei de ki lad social media ban pynbiej bad pynngop ïa ki briew kiba lui-lui lyngba ki jingkular thok ban ïathoh shongkurim ne aikam ai jam.
Na ka liang ki pulit ki buh ka jingkyntu ïa ki kmie ki kpa bad ki khun samla ba kin long husiar bad phikir ïalade khamtam haba ki don ki ‘riew nongwei kiba wan leh jan lyngba ki lad social media ne internet bad ruh ba kim dei satia ban ai ïa ki jingtip shimet ki jong ki, lane ban peit lorni ïa ki apps, ki links internet kiba don jingsuba sniew, naba ki runar ki ju pyndonkam lyngba kine ki lad ban pynbiej ïa ki briew kiba lui-lui ym tang ha ka kam khaïi briew, hynrei ha ki kam thok pisa tyngka ruh lyngba ki UPI ne kiwei-kiwei.
