Nongstoiñ, Risaw 28
Ka Hynñiewtrep Youth Council (HYC) West Khasi Hills kala dawa ba dei ban pynmih shuwa ïa ka risol eksamin DSC ba la dep bad sa phah thoh eksam biang.
Ïa kane la ong da ki nongïalam jong ka HYC hadien ba ka seng hapoh ka jingïalam u samla Lumlang Kharsyiemlieh President bad samla Wanteibok Lyngdoh GS, ha ka 27 tarik u bnai Risaw, 2025 ki la leit ban ïakynduh bad u Deputy Commissioner ka West Khasi Hills.
Ki nongïalam ka HYC ki la ong ba ka HYC ka pynpaw ïa ka jingsngewnguh ïa u Bah Garod LSN Dykes uba la ïaleh ban pynïaid shaid-shaid ïa ki eksam DSC ha kane ka snem 2025 kumba ka seng ka la ju ïakynduh khah-khah bad u halor ka DSC ha West Khasi Hills District.
Shuh-shuh ki la ong ruh ba ha kane ka sngi ka seng ym tang ba kala ïakynduh bad u DC, namar ki ïohi ki eksam ki bapher bapher kiba la dep naduh Grade IV bad LDA jong u snem ba la pynbna (Advertised) naduh 2020 kaba la pyndep eksam ha kine ki bnai ba la dep hynrei kala kyrpad ruh ban pynmih noh shuwa ïa ka risol jong kitei ki post barim (Advertise naduh December 2020) ba la dep phah thoh eksam ha kine bnai ba la dep.
Ki la ong ruh ba ka seng ka ïohi ba la pynbeit eksam biang ïa ki Grade IV bad LDA ha ka 22 bad 29 Naiwieng (November) 2025, kumta ka seng ka dawa ban pynmih shuwa ka risol shuwa ban phah thoh ïa kitei ki eksam.
Ki nongïalam ka HYC ki la ong ruh ba halor kane ka bynta na ka liang u DC hadien ba la ïatai sani bha u la kular ban sa pynmih shuwa ka risol ne Interview shuwa ban phah thoh eksam biang ha u bnai Naiwieng kumba la dawa da ka seng.
La ong ruh ba ka seng ha kajuh ka por ka la kylli ruh ïa ki post kiba la dep ‘advertise’ naduh 14 tarik Nohprah, 2020 kum ki Post Dufiry, Demonstrator ha Soil ïa kaba la pyndep ban mareh, katba ïa ka post Typist pat ym pat phah thoh eksam watla ki mih ‘Advertise’ lang naduh 2020 kaba kiwei post kum ki Grade IV bad LDA la dep phah thoh eksam bad halor kane u DC u la ong ba ïa kitei ki post ba dang sahteng yn sa pynbeit biang ha kine ki sngi ban wan.
