Shillong, Risaw 28
Ka All Jaiñtia Muster Roll Workers Union (AJMRWU) ka la ai por shi taïew ïa u Commissioner Secretary ka tnat Finance ka Sorkar Jylla u Vijay Kumar ban ai da ka jingthoh ban pynkiew ïa ka bainong ki nongtrei Muster Roll kaba long katkum ka Minimum Wage Act 1948.
Ïa kane ka rai ka All Jaiñtia Muster Roll Workers Union ka la rai hadien ba mih na ka jingïalang bad u Commissioner Secretary ka tnat Finance ka Sorkar Jylla u Vijay Kumar ban ïakren halor ka jingslem ka Sorkar ban siew bainong sha ki nongtrei Muster Roll.
U President ka AJMRWU u Bah Khro L Pariat haba kren sha ki nongthoh khubor u la ong, ka Sorkar ka pynkiew khatduh ïa ka bainong ki nongtrei Muster Roll ha u snem 2018. Nalor kata u la ong ba naduh u bnai Nohprah 2024 ka Union ka la ïakren bunsien bad ka Sorkar Jylla halor kane ka jingdawa jong ki hynrei haduh mynta ka Sorkar kam pat pynkiew ïa ka tulop jong ki.
“Ka Sorkar ka la kular ban pynkiew ïa ka bainong naduh u bnai Kyllalyngkot 2025 hynrei ngim pdiang ïa ka jingtyrwa jong ka Sorkar namar ka khlem ïaid katkum ka Minimum Wage Act 1948” la ong u Bah Khro.
U Bah Khro u la ïathuh ruh haka jingïalang bad u Vijay Kumar ka Union ka la byrngem ruh ban ujor sha ïingbishar Meghalaya High Court lada ka Sorkar kam lah ban pynurlong ïa ka jingdawa ka All Jaiñtia Muster Roll Workers Union.
Ka Union ka khot ïa baroh ki nongtrei Muster Roll ban mih shakhmat ban dawa ïa ka hok ba kila dep trei shitom bad ha ka 3 tarik u Naiwieng kan don ka jingïakynduh ha Shillong Press Club na ka bynta ban shim ïa ka rai ba la kin mih surok ban dawa ïa ka hok lane ba kin leit ban tied jingkhang ha ïingkashari ka Meghalaya High Court.
