Shillong, Risaw 28
Ka Meghalaya ka la jop haduh 11-0 kol pyrshah ïa ka Andhra Pradesh bad u Marbiang Marweiñ u la khur ïa ka hat-trick da kaba thep haduh saw kol ha ka Sub-Junior Boys National Football Championship 2025-26 (Tier 2) ha ka sngi Ba-ar ha Narainpur, Chhattisgarh.
Kane ka kynhun ïalehkai ka Jylla hapoh ka jingïalam u Dapmon Tariang (Coach), ka la lah ban pynliem da 6-1 kol pyrshah ïa ka Chhattisgarh ha ka jingïalehkai kaba nyngkong myn ha ka sngi U Blei. Te kumta kane ka kynhun ka la ïai bteng ban lamkhmat ha ka Group-C, ha kaba mynta ka la kamai 6 poiñ. Tang kawei ka kynhun ka ban bat ïa ka kyrdan ba hakhlieh napdeng ki saw tylli ki group ka ban ïoh rung sha ka semi final.
U Marbiang uba la ïohpdiang ïa ka nam Player of the Match, u la ïoh ban thep ha ka minit kaba 2, 24, 44 bad 45. U la thep ruh ar kol ha ka jingïakhun pyrshah ïa ka Chhattisgarh. Haduh mynta u la thep 6 kol.
Ïa kiwei pat ki kol la thep da u Ïaishanborlang Khongjee (9), Damebandon Mawkhroh (16), Wanpyndapbor Nongsiej (35), Shiborlang Dkhar (59 & 66), Davidson L Marshilong (81′) bad u Ferdinand Kharkrang (85).
Watla ka Meghalaya ka la don jingkyrmen ban rung sha ka semi final, hynrei ka donkam ban khur jingjop da kawei pat ka jingïalehkai kaba khatduh pyrshah ïa ka Himachal Pradesh ka ban long ha ka sngi Palei ha ka por 8:30 mynstep khnang ban pynthikna ban ïoh rung sha ka semi final.
