Shillong, Risaw 29
Ka Khun Hynñiewtrep National Awakening Movement (KHNAM) katkum ka jubab ba la ïoh na ka Right To Information (RTI) ka la lap ba ki don haduh 6 tylli ki khyrdop ka tnat Trade jong ka Khasi Hills Autonomous Dist-rict Council (KHADC) kaba la ai wai sha ki briew kiba khlem thep aplikeshon.
Ka KHNAM hapoh ka jingïalam u Bah Thomas Passah, Working President na ka jingïoh jubab lyngba ka RTI halor ki briew kiba thep aplikeshon kiba ïoh shim wai ban pynïaid ïa ki khyrdop ka tnat Trade ka KHADC, ha ka 29 tarik u Risaw, 2025 ka la ban leit ïakynduh ïa u Chief Executive Member (CEM) ka Council Bah Winston Tony Lyngdoh hynrei ka khlem ïoh ïakynduh ïa u namar ka jingbunkam.
Haba kren sha ki lad pathai khubor, u Bah Thomas u la ong ba u CEM hi u ong ba la aiwai ïa ki khyrdop ka tnat Trade halor ki aplikeshon bad kumta la pan kopi lyngba ka RTI ïa kiba thep aplikeshon.
Na ka jubab ba la ïoh, ki don haduh 16 ngut kiba aplai na ka bynta 10 tylli ki khyrdop hynrei kiba ïoh lyngba ki apliekshon ba ki la thep ki don tang saw ngut katba 6 tylli kum kitei ki khyrdop pat la ai sha ki briew kiba khlem thep aplikeshon bad kumta u Bah Thomas u la ong ba ka KHNAM ka pan jingshai halor kane ka phang.
Une u nongïalam ka KHNAM u la kynnoh ba u Executive Member (EM) ba khmih ïa ka tnat Trade ha KHADC u la ïalam bakla ha ka Dorbar ba dang shu kut jong ka Council halor kane ka phang jong ka jingai wai ïa ki khyrdop.
“Katkum ka jubab RTI, la paw shai ba 4 tylli ki work order la ai sha ki briew kiba la aplai bad 6 tylli ki work order la ai sha ki briew kiba khlem thep aplikeshon, kaba pyni shai ba ka jingkren u EM ba khmih ïa ka Trade hapoh ka ïingdorbar ka dei kaba ïalam bakla,” u la ong.
“Ngi la aiti da ka jingthoh halor kane ka kam bad dawa ïa ka jingpynshai na u EM ba khmih ïa ka tnat Trade. Ngi dawa ruh ba ïa kine ki khyrdop baroh dei ban pynthymmai biang lyngba ka lynti kaba shai bad ka rukom pynïaid kaba khuid, kaba kynthup ïa ka jingkhot tender lyngba ka advertisement ha ki kotkhubor bad ka jingbishar ïa ki kot tender lyngba ka Open Tender system,” bynrap u Bah Thomas.
