Shillong, Risaw 29
Ka kynhun ki ‘thei ïalehkai kriket U-19 ka Meghalaya ka la lah ban pynliem noh ïa ka Arunachal Pradesh da 31 run ha ka lympung ïalehkai U-19 Women’s T20 Trophy 2025-26 (plate group) ha ka sngi Balang ha Lucknow.
Ha lyndet kane ka jingjop katei ka kynhun ïalehkai ka Jylla, ka la wan lyngba ka jingïalehkai bha ka Cheanchi Kambesa Sangma.
Ha kane ka kynti ïakhun, ka Cheanchi ka la lah shwa ban kamai 30 ron bad ban ïai neh haduh ba kut jong ka pali bad hadien kane, ka la ïarap ruh ban khur 3 wiket na ka bynta 12 ron ha ka pali kaba ar, kaba la biang pura ïa ka Meghalaya ban khur ïa ka jingjop kaba nyngkong jong ka ha kane ka lympung, hadien ba ka la mad shwa ïa ki artylli ki jingshah rem ha ka Sikkim bad ka Manipur.
Ha katei ka jingïakhun ka Arunachal ka la jop ïa ka jingkynting pisa (toss) ha kaba la la ailad shwa ïa ka Meghalaya ba kan tied nyngkong. Te kumta ka Monica Singh ka la lamkhmat ïa ka kynhun ban kamai 27 ron na ki 24 tylli ki bol, bad bynrap lang sa ka Jayshee Singh,14 ron na ki 32 bol bad ka ka Cheanchi, 30 ron na ki 39 bol, na ka bynta ban seng ïa ka nongrim ban kamai 91 ron na ka bynta 6 wiket ïa ka Meghalaya na ki 20 over.
Wat lada ka thong ka lah ban long kaba rit, pynban ka la plie lad ïa ki nongkawang bol jong ka Meghalaya ban mih madan da ka mynsiem ban ïakhun ha kaba ki la lah ban pynhap 9 wiket ïa ka Arunachal hadien ba ka la lah ban kamai tang 60 ron na ki 20 over, ha kaba ka Kino Nanung marwei ka la lah ba kan kamai 20 ron.
Nalor ki 3 tylli ki wiket ba la khur da ka Cheanchi, ka Jayshree ruh ka la lah ban khur 3 wiket na ka bynta 9 ron na ki 4 over bad bynrap lang sa ka Fennysha Nongrum bad ka Banchila R Marak, kiba la ïoh ban khur lem mar shi wiket bad ban pynlong ïa ka Meghalaya ban khur ïa ka jingjop.
Ka Meghalaya kan pynkhreh biang ïa ka jingïakhun ka ban wan pyrshah ïa ka Nagaland ha ka sngi Thohdieng.
