Shillong, Risaw 29
U Dr. A Chellakumar u nongïalam ka All India Congress Committee (A-ICC) uba dei khmih ïa ka Meghalaya u la pynpaw ka jingsngewkhia kaba khraw halor ka jingkiew kaba shyrkhei jong ki nongpang HIV ha kane ka Jylla, da kaba pynïa-dei ïa kane bad ka Sorkar ba la lamkhmat da ka NPP bad kynnoh ba ka don ka jingïadei bad ki kynhun khaïi drok.
Haba kren sha ki lad pathai khubor ha ka sngi Balang, u Dr. Chellakumar u la ong ba ka jingdon jong ki briew kiba ïoh ïa ka jingpang HIV ha Meghalaya ka la poi haduh kaba ym lah ban mutdur, ha kaba kiba bun ki briew ki la shah ktah. U la ong ba kane ka pyni halor ka jingbym lah ne shimkhia jong ka Sorkar ban tehlakam ïa ka jingma jong u drok.
“Ka Sorkar ka kham sngewtynnad ban thok ïa ka pisa paidbah bad kamai beaiñ ban ïa kaba shakri ïa ki paidbah,” la kynnoh u Dr. Chellakumar.
“Da kaba bret pisa, ki pyrkhat ba ki lah ban thied ïa ki nongmihkhmat ba la jied da u paidbah, hynrei ngin ym ailad ïa kane ban jia,” u la ong.
Une u nongïalam ka Congress u la ong ba ka jingïalang jong ki dkhot ka executive committee jong ka seng ka la ïakren ïa kane ka kam bad ka la rai ban rah ïa kane ka kam sha ka Sorkar. “Ngin ïakhun pyrshah ïa ka Sorkar halor kane ka mat,” u la ong.
U Dr. Chellakumar u la pynpaw ïa ka jingngeit skhem ba ka Congress kan nang khlaiñ bad pynthymmai ïalade, wat hapdeng ka jingmih noh ba dang shen jong ki katto katne ki nongïalam ba rangbah.
“Ngim khuslai ïa ki riew shimet, ngi ngeit skhem ba ki nongtrei bad ki nongïalam jong ngi kin ïatreilang ban jop ïa ka ilekshon ha u snem 2028,” u la ong.
Ka Congress ka don ruh ka jingkyrmen ban jop ha ka ilekshon jong ka GHADC ban wan, kaba la buh ban long ha u snem ban wan. “Ngi ngeit skhem ba ngin jop ïa ka ilekshon,” la ong u Dr. Chellakumar.
