Ka jingwan phai bad rung biang jong u Zenith Sangma sha ka sem jong ka Congress, hato kan long biang pat ka jingsdang jong kane ka seng ban lah khie khlieh biang hapoh Meghalaya. Ngi tip ba ka Congress ka dei kawei na ki seng saiñpyrthei kaba la rim bad kaba heh kaba la ju ïoh ka jingieit na ki paidbah khamtam ha ka thaiñ nongkyndong ha ki snem kiba la leit, bad ruh ka dei ka seng kaba la bat bad synshar da ki phew tylli ki snem. Hynrei hadien ka ilekshon 2018, ka Congress suki pa suki ka la nangtlot-nangtlot bad ban poi haduh u pud ban khuid war syndon ka jingdon jong ki MLA hapoh ka Jylla, lait noh sa tang u MP na Tura bad ka jingdon jong ki lai ngut ki MDC jong ka, hapoh ka Jaiñtia Hills Autonomous District Council.
Ha ka ilekshon MLA ha u snem 2023, ka Congress ka la jop 5 ngut ki MLA bad tang hadien ar snem, kata mynta, ka la duh noh ïa baroh 5 ngut bad na kine, 4 ngut ki la pynïasoh noh sha ka NPP, katba u Saleng pat u la iehnoh kam na ka bynta ka shuki MP. Watla hadien ka jingphet noh jong ki MLA kane ka seng sha ka NPP bad jong ka jingdon ka jingïakren sharum shaneng ba ka Congress kan sa khuid war shi syndon hapoh Meghalaya, hynrei imat kane ka seng ka dang ïoh ring mynsiem bad i kumba suki pa suki kan sa lah ban khie khlieh biang. Ka shong pat ha ki nongïalam jong ka, kumno ban ïalam bad btin lynti. Watla ka la mih ka khubor jong ka jingkwah ban bujli noh ïa u nongïalam ba mynta u Bah Vincent H Pala, hynrei ha kum kane ka por, u Zenith Sangma uba la long teng u nongïalam bad MLA ka Congress ha ki por kiba la leit, u la wan phai biang sha la ïing, kata hadien ba ma u ryngkat bad kiwei ki 12 ngut ki MLA ki la phet seng noh shwa ka ilekshon MLA ha u snem 2023 ban leit pynïasoh sha ka All India Trinamool Congress.
Kane ka jingwan phai biang jong u Zenith, ka wanrah ruh ïa ka jingkyrmen ba ka Congress kan sa lah ban khie khlieh biang khamtam lei ha rilum Garo, kaba dei ka thaiñ kaba ka Congress ka ju khlaiñ bha ha ki snem kiba la leit. Hato ka jingwan phai biang jong u Zenith sha ka Congress, kan long kum ka jingsdang na ka bynta kiwei pat ki nongïalam bad MLA phet seng kum u Dr. Mukul Sangma, Bah Charles Pyngrope, ruh ba kin phai dien biang sha kane ka seng.
Ka jingwan phai biang jong u Zenith ha ka sem kaba mynta don lang u Saleng A Sangma, ka pyni sha ka pyrthei ba ha ka saiñ pyrthei ym don paralok ba ïai neh ne ki nongshun ba ïaineh shyrta namar ngi la ju sakhi hapoh ka ïingdorbar thawaiñ ha ki snem kiba la leit ha ka por jong ka jinglong MLA jong kine ki ar ngut, ka jingïakdew kti bad ïapyni nia ka ju jur bha hapdeng kine ki ar ngut haba ki ïatai ne ïakren halor ki mat kiba pher bapher. Ka saiñ hima ha rilum Garo nangne shakhmat kan sa long kaba itynnad bha bad shwa ban poi sha ka ilekshon MLA ha u 2028, ka ilekshon MDC kan sa dei ka dak ka ban pyni ba haduh katno ka Congress kan lah ban leh bha ne em.
