Shillong, Risaw 29
U myntri ka tnad ïalehkai ka Sorkar Jylla u Bah Wailadmiki Shylla u la pynpaw ba ka Jylla ka dangïai pynkhreh ban pynlong ïa ka National Games 2027, hynrei ki jingpynbiang ïa ki jaka sah ki dangïaid shakhmat bad na ka liang ka Indian Olympic Association (IOA) ka danghap ban ai ka jingmynjur kaba khatduh halor ki jaka ban pynlong ïa ki jingïalehkai.
U Bah Shylla haba pynpaw ha ki lad pathai khubor ha ka sngi Ba-ar u la ong ba na ka liang ka Sorkar ka dang pynkhreh bha bad dangtrei shitom ban pyndep ïa ki jingtei hashwa ban kut ka por.
Ki don katto katne ki projek jingtei ïa ki jaka ïalehkai kiba dangïaid shakhmat, kynthup ïa ka Jawaharlal Nehru Sta-dium, ha kaba bun na ki ‘tender’ ki la sdang ban ïaid shakhmat. Kawei pat ka jingtei kaba thymmai kum ka pung jngi bad madan ïalehkai tennis, ki dangïaid shakhmat ha New Shil-long, bad ïa ki hostel ki dangtei na ka bynta ban pynbiang jaka sah na ka bynta ki nongïalehkai.
Utei u myntri u la ong ba ka Meghalaya ka pynlut kham bun na ka bynta ban kyntiew ia ki jingïalehkai. Ki don katto katne ki projek kiba dangpyntreikam ha kajuh ka por, kynthup ïa ka jingtei ïa ki madan ïalehkai phutbol bad ruh ki stadium kiba heh ha ka thaiñ shatei lammihngi.
Haba ïa dei bad ka National Games, u Bah Shylla u la ong ba ka Jylla Meghalaya ryngkat bad kiwei-kiwei ki Jylla ka thaiñ shatei lammihngi kin ïasnoh kti lang na ka bynta katei ka lympung. Ïa ka jingkheiñ ba thikna na ka bynta ki jingïalehkai ki ban pynlong ha Meghalaya ym pat lah ban pynbeit.
U Bah Shylla u la ong ba ka sorkar ka la ai ïa ka bhah kaba nyngkong sha ki synjuk ïalehkai bapher bapher ban ïoh ïa ki jaka ïalehkai kilanmet bad ban thied ïa ki tiar ïalehkai. Te kumta ki synjuk ïalehkai ki la pynkhlaiñ bha na ka bynta ki jingdonkam ki nongïalehkai bad ban wanrah ïa ki coach kiba nabar jylla bad wat nabar ri ruh kumjuh.
Ha kawei pat ka liang utei u Myntri u la kyntait ban ai ïa ka jingkheiñ kaba thikna halor ka jingpynlut pynsep halor ka National Games, da kaba ong ba ka dangkloi palat ban ai ïa ka jingkheiñ kaba thikna. Hynrei u la pynthikna ba ka Meghalaya ka angnud ban pynlong ïa katei ka lympung kaba jop.
