Jowai, Risaw 29
U Myntri ka tnat Pule Puthi ka Sorkar Jylla Ma Lahkmen Rymbui ha ka 29 tarik Risaw u la plie ïa ka jingtei bathymmai jong ka ïingskul Amta-poh Government Lower Primary School kaba la seng ha u snem 1957 bad kaba shakri mynta ïa ki 131 ngut ki khynnah skul ryngkat saw ngut ki nonghikai naduh ka Pre-Nursery haduh Pre-Nursery haduh Class V.
U Ma Lahkmen Rymbui ha ka jingkren u la pynleit jingmut halor ka jingïaid lynti jong u, ha ka liang ka pule puthi naduh u snem 2018, da kaba pynpaw ba ka jingnoh synñiang kaba nyngkong eh jong u, kala sdang da ka mang pisa kaba 4 lak tyngka na ka bynta ka SSA Upper Primary School.
U la pynpaw ka jingsngewnguh kaba khraw ïa ka jingshaniah jong ki paidbah, da kaba ong, “Phi la jied ïa nga ban ïaleh na ka bynta ka hok jong phi, ym da ka jingsngew sarong, hynrei da ka jingkitkhlieh’.
U Myntri u la ïaroh ruh ïa u Myntri Rangbah ka Jylla Conrad K Sangma uba la buh hakhmat eh ïa ka pule puthi, da kaba kdew ba ka jingnang jingstad jong ka Meghalaya mynta ka la tam ïa ka 90% lyngba ka jingpyrshang kaba ïaid beit bad ka jingïatreilang hapdeng baroh ki nongshim bynta.
U la pynbna ba shen yn sa pyntreikam ïa ka Mission Education-4 ban pynbha ïa ki jingtei ha ki skul Sorkar, kaba ai jingmyntoi ïa ki jaka pule kum ka Umladkhur bad ka Lamin Government LP School.
Haba pynpaw ïa ka jingkiew ha kine ki hynñiew snem ba la dep, u Ma Lahkmen u la ong ba ka jingai jingïarap ïa ki samla pule ka la kiew bha, ha kaba ka Chief Minister’s Scholarship Scheme mynta ka ai pisa T.6,000 na ka bynta uwei u samla pule man u snem, ryngkat bad kiwei pat ki skhim kum ka Post Matric bad Border Area Scholarship kaba long T.30,000-35,000 shi snem.
U la kren ruh shaphang ka jingpynbeit ryntih ïa ki nonghikai, da kaba kdew ïa ka jingbym ïahap ha ka jingkheiñ jong ki khynnah skul bad ki nonghikai, ha kaba ka Amtapoh ka don 131 ngut ki khynnah skul bad 4 ngut ki nonghikai, haba ïanujor bad ki skul kiba kham rit kiba don ïa ki nongtrei kiba ïadei dur, u la ong ba ka Sorkar ka dang trei ban pynbeit ryntih ïa ki rukom ai jingïarap, katba ka skhim SSA kan kylla ha u bnai Lber 2026.
U Ma Lahkmen u la kren ruh halor ka dorkhas ba la aiti da ka shnong Amtapoh ha kaba ïadei bad ka jingpynbiang um, da kaba pynthikna ba katba ka bynta ba nyngkong jong ka Jal Jeevan Mission (JJM) ka ïakynduh ïa ki jingeh, ka bynta ba ar kan pynbeit kham bha ïa ki jingdonkam ha ka thaiñ. U la kren ruh shaphang ka jingpynkylla ïa ka ïoh ka kot, da kaba kdew ïa ka jinghiar ha ka rep synsar bad pynshlur ïa ki samla ban seng kam seng jam lyngba ka Prime Hub ha Shkentalang.
U la kdew shuh shuh ïa ka jingmang pisa kaba T.5 lak na ka MLA Scheme jong u bad ka jingnoh synñiang shimet kaba 1 lak tyngka tam na ka bynta ka jingpynkhreh ka Balang U Blei ïa ka jingïaseng Nongtrei ka ban wan ha u 2027.
Ïa ka jingïalang la pynïaid da u Principal Iangrai Khongiong bad la ïoh ka jingkren pdiang na u Secretary Shnong Amtapoh Mac Donlad Pohthmi, kumjuh ka jingkren lyngkot shaphang ka skul na u Waheh Shnong Amtapoh Bhun Manar.
La pynphuh pynphieng ïa ka jingïalang da ka jingïashim bynta ki khynnah ha ki jingrwai bad jingshad ha ka jingdonlang ki nonghikai, ki kmie ki kpa nalor ki riew rangbah ka thaiñ.
