Shillong, Risaw 29
U MP na Tura u Saleng A Sangma u la pynpaw ba ka lad ka plie ïa kino-kino kiba kwah ban wan pynïasoh biang sha ka Congress, da kaba ong ba ka seng ka pdiang sngewbha ïa baroh.
U Saleng u la pynpaw ba um kwah ong eiei haba ïadei bad u Dr. Mukul la un wanphai ne em, namar ba ma u hi dalade u la ong ba un ym ïasoh shuh lano-lano ruh bad ka Congress.
U Saleng u la ong ba ka jingwan pynïasoh ki nongïalam barim ka dei namar ba ka seng ka la sdang ban khie im ha ka Jylla bad u la pynshong nongrim ïa ka jingïaineh ka Congress ban ïai don ryngkat bad ki paidbah bad ong ba ka seng kan nym kut, hynrei kan ïai don ha ka Jylla Meghalaya.
“Kam mut ba baroh ki nongïalam barim ka Congress kin shah pdiang sngewbha biang, hynrei ngin sa peit katto katne namar ngin wanrah biang ïa ki baroh lehse kam long namar don napdeng jong ki kim biang,” la ong u Saleng.
Haba ïadei bad ka jingphet seng u Zenith Sangma na ka Trinamool Congress (TMC) bad wan pynïasoh biang sha ka Congress, u Saleng u la ong ba u pdiang sngewbha ïa katei ka sienjam da kaba u la ong, ba ka seng ka pdiang sngewbha ïa kiba kwah ban wanphai biang sha ka Congress namar ba U Blei u la ai ha ki ka mon laitluid ban jied, ym lah ban bishar ïano-ïano.
U Saleng la ai jingïaroh ïa ka Deborah Marak, ka nongïalam ka Congress, ïa ka jingtrei shitom jong ka ban wanrah biang ïa u Zenith Sangma sha ka Congress.
Haba ïadei bad ka ilekshon ha Garo Hills Autonomous District Council (GHADC) ka ban sa long, u Saleng u la ong ba ka rai ka shong ha ki paidbah bad ka jingthmu jong ka seng ka dei na ka bynta ka jingbha jong ki paidbah bad u la ong, “Lada ki paidbah ki kwah ban pdiang, ai kin pdiang ïa ka, hynrei ka dei ka mon ba laitluid jong ki, namar ka Congress hi, ka pyrshang beit kaba bha tam na ka bynta ki paidbah.”
Ha shwa jong kane, na ka liang jong ka Meghalaya Pradesh Congress Committee ha ka sngi Balang ka la pdiang burom biang ïa u Zenith Sangma uba dei u MLA barim ka Rangsakona uba la wan pynïasoh biang ha ka seng kaba la pynlong ha Congress Bhawan, Shillong.
Ha kane ka jingpdiang ïa u Zenith Sangma la donlang u heh ka AICC ba dei peit ïa ka Meghlaya u Dr. A Chellakumar, u President ka MPCC u Bah Vincent H Pala, u MP ka Lok Sabha na Tura Constituency u Saleng Sangma, ka Debora Marak bad kiwei-kiwei bad la synran lang ïa u Zenith da ki nongkyrshan jong u.
