Ka Nongnah ka long kawei na ki shnong kaba la rim bha ha ka thaiñ Riwar Sepngi. Ka Nongnah ka hap hapoh ka Hima Maharam Syiemship, ka South West Khasi Hills District. Ka Nongnah ka long ka shnong kaba la ker da ki riat mawsiang (Natural Fort) lait noh phang shathie la ker da u Lum ka Iawpaw. U Lum ka Iawpaw u long u lum uba ïong kum ka kynroh bah uba ker ïada ïa ka shnong na ki nongshun kiba wan na ka ri Bangladesh ka East Pakistan mynnor.
U lum ka Iawpaw u don la ka khana ba la don kata ka Lei Iawpaw kaba shong ba sah ha une u Lum naduh ki por mynbarim. Ka Thlong blei ka don phang shathie lam mihngi ha ka lynti ban leit sha Balat da ka lynti ïaid kjat na Nongnah. Kane ka long ka khana kaba la ju iohsngew naduh ki por ba ngi dang rit ba ki ju ïathuh khana pateng ba don kata ka lei Iawpaw halor une u Lum. Don teng teng ki pyntieng ïa ngi ki khynnah ban leit kiew halor une u lum ha por ba mynshuwa. Ka Nongnah kumba ka long mynta ka la heh shnong ka la don haduh phra kyntoit shnong kiba hap hapoh ka Nongnah.
Ki kyntoit shnong kiba hap hapoh Nongnah ki long ka Thangrai, Nongkdait – Nongdom, Nongkdait – Nongtwah, ka Mawhyndeng, ka Domsohkhai, ka Nongbah bad ka Nongktieh bad ka Mawtajem. Ki don ki shnong kiba la leit buhai shnong bad ki la mih na Nongnah. Kine ki shnong ki long ka Ditum tum, Myriaw, Kolomboit, Pyndonlaru, Mawlongbah, Dirang, ka Mawphulim, ka shnong Khadphra ne Tban lang jrong, ka phetkroh, ka Panchering bad ka Ranikor ki dei ki nongshong shnong na Nongnah kiba la leit buhai shnong.
Ka Nongnah ka long kum ka kmie jong kine ki shnong. Ki Nongshong shnong ka Nongnah ki im da ka rep ka riang. Ki rep bad thung u Tympew, Sohmrit, u sohniamtra, u sohkwit, u sohnairiang, u sohpriam, u phandieng, u shriew, u phankaro, u Lasi ne Latyrpat bad u synsar (kdait) mynta. Ki nongshong shnong ka Nongnah la jan baroh ki la don ha ka niam khristan kum ha ka balang Presbyterian, Balang U Blei, Balang U Jisu Khrist, Ki Fellowship bad ki Katholik. Kiba don ha ka niam Khasi tynrai ki la duh mynta. Mynshuwa te ki don, ki trai jaka trai khyndew ka Nongnah ki long ki kur Lyngkhoi, Kharryja, bad Pariong.
C. B. Iawphniaw
