Shillong, Risaw 29
Ka Kong Bertina Lyngdoh kawei na kiba don jingduna ha ka bor ïohi, ka la mih shakhmat ban pynpaw ïa ka jingsngewdiaw mynsiem hadien ba ka jingkular u Myntri Rangbah ka Jylla u Conrad K Sangma ban ai kam ai jam kam shym la urlong haduh mynta.
Haba ïakren bad ki lad pathai khubor ha ka 28 tarik u Risaw 2025, ka Kong Bertina Lyngdoh ka la ïathuh ba myn ha ka 07 tarik u bnai Jymmang (May) 2025, ka la leit ban ïakynduh ïa u Myntri Rangbah, u Conrad K Sangma haba ïadei bad ka kam ka jam, ba un ïarap lem ban ai kam ai jam.
“Ha ka jingïakynduh bad u Myntri Rangbah, u la kular ba un sa ïarap ïa nga haba ïadei bad ka kam ka jam. U khlem kular tang ïa nga hynrei u la kren ruh wat sha ki nongthoh khubor,” la ong ka Kong Bertina.
Ka Kong Bertina ka la ïathuh, “Hooid u Conrad u la ïarap pisa haba ïadei bad ka jingpule jong nga, hynrei nga ban jur hakhmat jong u ka long, ba nga donkam ïa ka kam ka jam kaba biang katkum ka jinglah jong nga bad katkum ka jingshemphang jong nga”.
Ka la ïathuh ruh ba halor ka kam ka jam, na ka ophis treikam jong u Conrad K Sangma ki la bthah ba ïa kane ka kam la aiti ha u wei u ophisar ban peit. “Nga la phone ïa u ne u ophisar u ba la shimti ban ïarap pynïoh kam pynïoh jam ïa nga bad u ong ban phah shwa ïa ki kot ki sla ba donkam. Hadien shi taïew nga la phone biang ban kylli haba ïadei bad ka kam ka jam hynrei haduh kine ki bnai ba mynta ruh kim shym la long kam satia,” ka la bynrap.
Kumta ka la mih shakhmat ban kyrpad ïa ka Sorkar ban pynkloi ïa kane ka kam, khnang ba kan lah ban pyndap pynbiang ïa ka ïing ka sem.
“U Conrad u la kren shai bad kular ruh ha khmat jong nga, ba un sa ïarap ïa nga, ban pynïoh kam hynrei haduh mynta ngam shym la ïoh eiei bad khlem ïoh jingtip,” la ong ka Kong Bertina.
Shuh shuh ka la ong ba man ka sngi ka leit bah ïa u khunlung ba dang shi snem tam ban ïaid sharum shaneng ban die jingdie tang ban ïoh pyndap ha ïing hasem.
Kumta ka Kong Bertina ka la ong ruh ba u Conrad K Sangma u dei ban jubab halor kane ka bynta, ba balei ka slem ban pynïoh ïa kata ka kam ka jam.
Nalor kata, ka Kong Bertina ka la ong ba kumno ka Sorkar kam lah ban pynkohnguh lem sha baroh ki jaka pule ne ki ophis treikam, ba ki briew ba don jingduna ha ki dkhot met ruh ki don ka hok ban ïoh lem ïa la ka jong ka bynta.
