Shillong, Risaw 29
U MLA barim ka Rangsakona, u Zenith Sangma, uba la iehnoh ïa ka All India Trinamool Congress (AITC) bad pynïasoh biang sha ka Congress, ha ka Sngi Balang, u la kiar ban kren eiei halor u hynmen rangbah jong u bad Myntri Rangbah barim ka Jylla, u Dr. Mukul Sangma la un wan pynïasoh biang ne em sha ka seng.
Haba kylli halor ki jingthmu ba hadien-habud jong u Dr. Mukul Sangma, u Zenith u la ong ba u hynmen jong u, u dei u nongïalam uba la ih bad shemphang bha ha ka kam saiñ pyrthei bad uba don ruh shibun ka jingtip, bad ka long kaba biang tam ban kylli hi na u haba ïadei bad ki jingthmu jong u.
“U dei u nongïalam uba tbit ha kiba bun ki liang – uba la don ha ka kam saiñ pyrthei la slem bah mynta, uba don shibun ka jingnang-jingtip, ka jingstad, bad ka jingriewspah ha ka jingshemphang,” la ong u Zenith.
“Kumta, kaei kaba u pyrkhat bad kaei ka rukom pyrkhat kaba jia ha ka jingmut-jingpyrkhat jong u, ïa kine u tip kham bha ma u,” u la ong.
U Zenith u la kren shai ruh ba um don bor ban kren eiei na ka bynta u hynmen jong u bad ba u Dr. Mukul Sangma un sa shim ïa ka rai lajong ha ka por kaba biang.
“Ynda la dei ka por, u lah ban shim ïa kano-kano ka rai bad kata ka shong ha u,” u la ong.
“Ngam kwah ban ngam jylliew ha kane ka bynta bad nga kyrpad ïa phi ban kylli ïa kane ka jingkylli tang na u,” u la ong.
