Shillong, Risaw 29
U MLA barim ka Rangsakona u Zenith Sangma uba la wanphai biang sha ka Congress hadien ba u la mih noh na ka All India Trinamool Congress (AITC) u la ong ba ka jingwanphai biang jong u sha ka Congress kadei namar ba ka Sorkar MDA-II ba la ïalam da ka National People’s Party ka la pynjot ïa ka Jylla lyngba ki kam bamsap.
Haba kren sha ki nongthoh khubor u Zenith u la ong, ka jingwanphai jong u sha ka Congress ka dei kaba u la pyrkhat bha, ïa kaba u la kheiñ kum “ka ïing barim jong u” bad da ka jingthmu ban ïakhun pyrshah ïa ka Sorkar Jylla ba bamsap na ka bynta ban pyllait im ïa ki paidbah jong ka Jylla Meghalaya.
“Ka jinglong jingman ha ka Jylla Meghalaya bad ka Ri baroh kawei, ka rukom synshar la ka long ha ka Jylla Meghalaya ne ha ka Sorkar India, ki la pynjot ïa ka Ri,” la ong u Zenith.
U la kynnoh ba ka Sorkar kaba mynta ha Meghalaya, ka long kaba bamsap bad kaba la pynjot ïa ki bynta bapher-bapher, kynthup ïa ka tnad pule puthi bad ka tnad ka koit ka khiah bad ha baroh ki tnad Sorkar namarba jur ka kam bam sap, kaba ka Sorkar ka la pynjot ïa ka Jylla.
U Zenith u la kam ba ha ka por ba u la long teng kum u Myntri Sorkar u khlem don bynta eiei haba ïadei bad ka kam bamsap bad u la kop ïa ka Sorkar Jylla ba lada ka leh kano-kano ka jingwad bniah haba ïa dei bad ki tnad ba u bat, u la ong ba um don kano-kano ka jingeh namar wat tang iwei i kam barit ruh um shym la pyndonkam bakla ïa ka pisa paidbah.
Haba kylli ha kaba ïadei bad u hynmen jong u, u Dr. Mukul Sangma bad ka TMC, u Zenith ula ong, ha ka kam saiñ hima, ym don bahaïing ba hasem hynrei kaba kongsan ka dei ban pynleit jingmut ïa ka jingbit jingbiang ki paidbah.
U Zenith u la ong ba u wan ban ïasoh biang sha ka Congress namar ka dei ka party kaba la tip paidbah hapoh ka Jylla bad ka Ri ruh baroh kawei bad ka la don ruh sha ki bynta ba kyndong kynshrot jong ka Jylla.
Haba kylli ïa ka bynta jong u ha ka seng, u la kam ïalade ba u long “u shipai ba shisha” jong ka party bad kubur ba un leh ïa kano-kano ka kam ba ka party ka bynshet ha u.
