Nongstoiñ, Risaw 29
Ka Futsal Association of West Khasi Hills District sa shisien ka la pynlong biang ïa ka lympung ïalehkai ba la tip kum ka 2nd Inter Office Futsal Tournament 2025 ha ka sngi Ba-ar ha kaba la wan ïashim bynta da ki ophis treikam bapher bapher na ki tnad sorkar jong katei ka district kynthup ïa ki kynthei bad shynrang.
Ïa katei ka lympung kaba la pynlong ha Leonel Futsal Arena, Pyndengrei ha kaba ka Kong N. Wanñiang kaba dei ruh ka EAC jong ka WKHD ka la long ka kongsan ha ryngkat ka jingïadonlang ki dkhot katei ka synjuk bad kiwei kiwei.
Ki la don haduh 8 tylli ki ophis sorkar ha ka liang ki kynthei bad 27 tylli ki ophis ha ka liang ki shynrang kiba la wan ïashim bynta.
Haba phai sha katei ka sngi plie ha ka liang ki shynrang ka la long hapdeng ka Meghalaya Home Guard pyrshah ïa ka Fisheries, hynrei ka Fisheries ka la jop lyngba ka tie-breaker da 1-0 kol, katba ha ka liang ki kynthei ka Health Department ka la pynliem noh ïa ka District Police lyngba ka tie-breaker da 1-0 kol.
Haba ai jingkren ha katei ka jingïalang ka Kong N. Wanñiang ka la ong ba kane ka jingïalehkai ka long kumba u Myntri Rangbahduh ka Ri India u Narendra Modi u la ïalap shaphang ka Fit India Movement kaba ai ïa ka khubor bad kyntu ïa baroh ba kin long kiba khlaiñ ha ka bor met bad bor pyrkhat lyngba ki jingïalehkai bad ban lait ruh na ki jingsniew.
Shuh shuh ka la kyntu ruh ïa ki nongtrei ha ki tnad sorkar bapher bapher ba kin pyllait ïa ka por na ka bynta ban ïalehkai la ka long ha kino kino ki bynta jong ki jait jingïalehkai namar kan ïarap ban pyllait na ki jingsngewsih ban lait na kaba ktah ïa ki jingmut jingpyrkhat kiba lah ban wanlam ïa shibun ki jait jingpang.
