Shillong, Risaw 29
Hadien ba la kut ka lympung ïalehkai Shillong Premier League 2025, ka Shillong Sports Association (SSA) kan sdang noh ïa ka Super Cup Football Tournament 2025 ha ka 31 tarik mynta u bnai ha SSA Stadium, First Ground ha Polo.
Ki hynriew tylli ki kynhun ne ‘top 6’ kiba heh poiñ duh ha ka miej ïakheiñ poiñ ha ka SPL 2025, ki long ka Langsning FC kaba bat ïa ka nam lahduh da kaba lamkhmat ha kane ka lympung da 20 poiñ, ba-ar ka Shillong Lajong kaba la ïoh 19 poiñ, ka Mawlai (19 poiñ) ha ka kyrdan balai, ka Nangkiew Irat ha ka kyrdan basaw da 14 poiñ, ka Rangdajied United FC ha ka kyrdan basan da 13 poiñ bad ka Sawmer SC ha ka kyrdan ba hynriew da 12 poiñ.
Ka Langsning bad ka Lajong kiba don ha ka kyrdan kaba nyngkong bad ba-ar kin ïoh rung beit beit sha ka semi-final, katba ka Nangkiew Irat kan ïakhun pyrshah ïa ka Rangdajied United FC ha ka quarterfinal kaba nyngkong ha ka 31 tarik bad ka Mawlai SC ïa ka Sawmer ha ka quarter final kaba ar ka ban long ha ka 1 tarik u Naiwieng. Baroh ar ki jingïakhun kin long ha ka por 5 baje janmiet.
Dangshen ha ka SPL, ka Nangkiew Irat ka la ïakhaid mar 1-1 kol bad ka Rangdajied myn ha ka 5 tarik u Nailur mynta u snem, katba ka Mawlai ka la jop da 6-2 kol ïa ka Sawmer ha ka 7 tarik u Nailar.
Kiba jop hapdeng ka Nangkiew Irat bad ka Rangdajied United FC kin ïakhun pyrshah ïa ka Langsning ha ka semifinal kaba nyngkong ka ban long ha ka 7 tarik u Naiwieng bad kiba jop hapdeng ka Mawlai bad ka Sawmer kin ïakhun pyrshah ïa ka Lajong ha ka semi final kaba ar ha ka 8 tarik u Naiwieng. Katba ka final kan long ha ka 13 tarik.
