Shillong, Risaw 29
Ka Sorkar Jylla ka la mynjur ïa ka Meghalaya Village Defence Organization Rule, 2025 (MVDOR, 2025), bad kyntiew ruh ïa ka jingsiew na lade ne ka ‘Out-of-pocket Allowance’ na bynta ki Village Defence Party (VDP), na ka T.300 sha ka T.3000.
Ïa kane ka rai la shim da ka Kynhun Myntri ka Jylla ha ka jingïalang ba la pynïaid da u Myntri Rangbah ka Jylla, u Conrad K. Sangma ha ka Sngi Balang.
Haba kren sha ki lad pathai khubor hadien ka jingïalang, u Myntri Sorkar, uba dei ruh u nongaiktien ka MDA, Bah Wailadmiki Shylla u la ong ba kane ka kyndon thymmai ka batai ïa ki bynta bad ki jingkitkhlieh jong ki VDP ha ki kyrdan bapher-bapher, naduh ka Jylla haduh ki distrik.
Haba ïadei bad ka jingkyntiew ïa ka jingsiew na lade, la khmih lynti ba kan nang pynshlur shuh-shuh ïa ki VDP ban nang kham trei shit rhem, khamtam ha ka ban shimkhia ïa ki jingeh kiba ïadei bad ki kam runar, drok, bad ka jingshngaiñ ha ki khappud.
“Ngi kwah ba ki VDP kin long kiba trei shit rhem khamtam kumba phi tip ba ngi mad ïa ki jingeh ha ka liang ki kam runar, u drok bad wat ha ki jaka khappud. Ngi kyrmen ba da kane ka kyndon thymmai, nga tharai ngin sa lah ban pynshlur ïa ki shnong ban thaw ïa ki VDP,” ong u Bah Wailad.
Na ka liang u Myntri, u la ai ksai ruh ba ka Sorkar ka thmu ban pynthymmai ïa ki VDP da kaba ai sha ki ïa ki ‘Uniform’, ki ‘walkie-talkie’, bad ka jingpynithuh kaba biang bad ba tikna.
Ha kajuh ka por, u la ban jur ba ka Sorkar ka dang trei ban pynkup bor ïa ki VDP na bynta ban pynneh-pynsah ïa ka suk ka saiñ ha la ki jong ki jaka.
