Shillong, Risaw 29
Ka Sorkar Jylla kala ai jingmynjur ban thungkam pura noh ïa palat 283 ngut ki special educators (ki nongai jinghikai ba kyrpang) ha ka Jylla.
Ïa kane ka rai la shim da ka Kynhun Myntri (cabinet) ha ka jingïalang kaba la long ha ka sngi Balang kaba la pynïaid da u Myntri Rangbah ka Jylla Conrad K Sangma.
Haba kren sha ki lad pathai khubor hadien ka jingïalang, u Myntri Sorkar bad Nongaiktien ka Sorkar MDA Bah Wailadmiki Shylla u la ong, “Ka Kynhun Myntri kala ai jingmynjur ban thungkam pura ïa ki special educators bad ki kam kiba ïasyriem bad ki kumba la kdew ha ka hukum ka ïingbishar Supreme Court”.
Shuh shuh u la pyntip ba ïa mynta, ki don 283 ngut ki special educator kiba trei kum ki contract bad ka Kynhun Myntri kala mynjur ban plie ïa ka lynti ban thungkam pura noh ïa ki.
