Shillong, Risaw 29
Ka Umngi River Owner and Fisherman Organization (UROFO) South West Khasi Hills kala pynmih ïa ki kyndon ban ïada ïa ki doh um ha ka Wah Umngi bad kumjuh ruh ban pynneh ïa ka khuid ka suba ha rud Wah.
Kane ka dei namar ka jingjur ka jingwan tuid ki nongkhwai bad ki nongwan shangkai pyrthei ha kane ka Wah kaba lah ban wanrah ka jingma ïa ka Wah Umngi.
Hashuwa kane ka sngi, ka Umngi River Owner and Fisherman Organisation kala leit thung ïa ki jingmaham (Notice) ha shi lynter ka Wah Umngi.
Ki nongïalam bad ki dkhot ka Organization kila pynlong ruh ka jingpynkhuid ïa ki plastic bad tam ruh ïa ki bilor bad ki jaboh na shilynter ka Wah Umngi.
Ka Organization ka kyntu ïa ki nongwan shangkai ne ki nong khwai ba kin lehkhuid bad kim dei ban pynpait ïa ki bilor ne bret pathar ïa ki kynja plastic ha Wah lane ha rud Wah.
Ki jingmaham ki kynthup, ba ym shah shuh ban siat bom ha shi lynter ka wah Umngi, ym shah ban pynhap jar ne ai dawai pynïap dohkha ha baroh ki thwei ka wah Umngi, ym shah ban khwai nar (kynpet khwai suda) bad ym shah ban pyndonkam electric current ne battery ban tong dohkha.
Kine ki kyndon bad ki jingmaham ki treikam ruh ha ki wahrit kum ha Photshylla, Kynsan bad Phot Taiuh.
La maham ruh ba ki nong khwai kim dei ban bret klumar ïa ki bilor ne plastic ha wah bad ki dei ban lum ne thang noh bad lada lap ïa kiba leh pyrshah yn pynshitom katkum ki kyndon aiñ.
