Shillong, Risaw 29
Ha ryngkat ka jingpdiang burom ïa u Zenith M Sangma, MLA barim ka Rangsakona uba la iehnoh ïa ka All India Trinamool Congress, ka Meghalaya Pradesh Congress Committee (MPCC) ka la pdiang burom ruh ïa ka jingwan pynïasoh kiwei ki nongïalam ba kynthup ïa u Bah Lionel Nongkhlaw, u nongtrei mon sngewbha uba la aireng ha ka ilekshon MDC 2025 sha Khasi Hills Autonomous District Council (KHADC) na Mylliem Constituency hynrei u khlem poi sha ka thong.
Ha kane ka sngi, la ïadonlang u Chella Kumar, General Secretary ka All India Congress Committee ba khmih ïa ka Meghalaya, u Anthony Matthew, Joint Secretary AICC In-charge Meghalaya, u Bah Vincent H Pala, President MPCC, u Saleng A Sangma, MP Lok Sabha na Tura Parliamentary Constituency lem kiwei-kiwei ki nongïalam ka Congress.
Kum ban shu kdew ba ka Congress ka la brut syndon ha ka jingdon MLA ha ïingdorbar thawaiñ ka Jylla Meghalaya da ka jingphet noh u Bah Ronnie V Lyngdoh, MLA ka Mylliem sha ka National People’s Party ha u bnai Naitung mynta u snem.
U Bah Lionel u la ïakhun kum u kyrtong khlem seng pyrshah ïa saw ngut kiwei pat ha ka ilekshon MDC ba la dep kata ka Kong Aibandaplin F Lyngdoh na ka VPP kaba la jop ïa kane ka ilekshon, u Bah Gilbert Laloo na ka UDP, u Bah Banphiralang Basaïawmoit na ka Congress bad u Bah Finestar Kharkongor na ka NPP.
Mynta da ka jingwan pynïasoh pura u Bah Lionel kumta kan don ka jingïatreilang bad u Bah Banphiralang Basaïawmoit ha ka jingïaid lynti ka seng na ka bynta ka ilekshon MLA ha u snem 2028.
