Shillong, Risaw 29
Ka hat-trick ba la ioh da u Aldo M Nongneng ka la biang pura ïa ka Mawtawar SC ban pynliem noh ïa ka Ryntih SC da 7-2 kol na ka bynta ban khur ïa ka jingjop kaba ar ha ka SSA 1st Division Football League-2025 ha ka sngi Balang.
Ha kane ka jingiakhun kaba la long ha SSA Stadium, Polo, u Aldo u la khur ïa katei ka hat-trick hadien ba u la ïoh ban thep ha ka minit kaba 15, 32 & 63, katba u Fedrick Lyngdoh (5 & 56) bad u Donkupar Kharmyndai (48 & 59) ki la thep mar ar kol. Na ka liang ka Ryntih ka la pynphai kylla ar kol lyngba u Leversharp M Syiemlieh (17) bad u Shngaiñlang Sohbar (80).
Lyngba kane ka jingjop ka Mawtawar ka dangsah ha ka kyrdan basaw bad kamai 8 poiñ na ki hynriew sien ïakhun, katba ka Ryntih ka dangïai sah ha u laiñ jong ka jingma ban shah pynhiar kyrdan ryngkat ka Lawsohtun bad ka Pohkseh, kiba la ïoh tang mar 1 point.
Ka jingïalehkai ha ka sngi Palei kan long hapdeng ka Nongkseh SC pyrshah ïa ka Mawkhar SC ha ka por 1:15 mynsngi.
