Khliehriat, Risaw 29
Ka Sutnga SSCC ka la khur jingjop ha ka lympung ïalehkai Super Division Football Tournament ba la pynïaid da ka East Jaiñtia Hills District Football Association (EJHDFA), hadien ba ka la pynliem noh ïa ka Ladrymbai B SC da 4-0 kol ha ka sngi Balang ha madan artificial turf Diengshynrum, Khliehriat.
Naduh kaba sdang kitei ki kynhun ki la lah ban ïalehkai bha na ka bynta ban pynpaw ïa ka jingtbit, hynrei ha ka minit kaba 21 ka Sutnga ka la ïoh ïa ka kabu ksiar ban pynkhih jar lyngba ka penalty ba la shut da u Niponghi Sumer. Kane ka shi kol ka la ïai neh haduh kaba kut jong ka kylla step.
Hadien katto katne por ba la bteng ïa ka jingïakhun jong ka kylla miet, ka Sutnga ka la thep biang ïa ka kol kaba ar lyngba u Sauni Phawa (51). U Niponghi Sumer u la pynbud biang ïa ka kol kaba ar jong u ha ka minit kaba 67. Ïa kawei pat ka shi kol la thep da u Coming Dkhar (73) na ka bynta ban khur syndon ïa ka jingjop hadien ba ka liang pyrshah kam shym la lah ban pynphai haduh kaba kut.
Haba phai sha kawei pat ka jingïalehkai kaba bud, ka Rymbai Skhenshynriah SC bad Shilliang Umshong SC ki la ïasam mar shi poiñ hadien ba ki la ïakhaid mar 2-2 kol.
Ïa ki kol jong ka Rymbai Shkenshynriah la thep da u Goldenson Japui (2) bad u Ribiang Dkhar (25), katba na ka liang ka Shilliang Umshong ka la pynphai kylla lyngba u Henjoymang Khongsai (21) bad u Sambha Ksih (83).
