Shillong, Risaw 29
Ki nongïalehkai ka Jylla na ka Meghalaya Police ki la lah ban pynpaw ïa ka jingtbit ha ka 3rd Tawang International Marathon 2025 kaba la long ha 24 tarik mynta u bnai bad ki la wan ha ka kyrdan ba nyngkong bad ba-ar.
Ha kane ka jingïakop mareh ba la pynlong da ka sorkar Arunachal Pradesh lem bad ka Indian Army, ka Jidalin Tympuiñ lem bad u Badon Sing Tham ki la khur ïa ki takma ksiar, katba u Kolan Swer, ka Nangkiewsuki Slong bad u Hepstarly Lyngkhoi ki la khur ïa ki takma rupa.
Ka Jidalin jong ka 3rd MLP Battalion ka la khur ïa katei ka takma ha ka Overall 5K Run (Female) da kaba pyndep ha ki 25:40 sekhon lem bad u Badon Sing na ka Fire & Emergency Service, Sohra u la lah ban khur ïa katei ka takma ha ka 10K Run (50-59 years) da kaba pyndep ha ki 51:26 sekhon.
Ïa ki takma rupa la khur da u Kolan na ka Special Force-10 ha ka 10K Run (40-49 years) da da kaba pyndep ha ki 51:16 sekhon, ka Nangkiewsuki (Special Force-10) ha ka 10K Run (Female 18-29 years) kaba la pyndep ha ki 54:48 sekhon bad u Hepstarly (West Khasi Hills DEF, Nongstoiñ) ha ka 5K Run (Male 18-29 years) kaba la pyndep ha ki 19:16 sekhon.
Ha kawei pat ka liang i Kong Kmoiñ Wahlang, ba la 77 snem ka rta na Sakwang, South West Khasi Hills i la khur ïa ka takma rupa ha ka jingïamareh kaba 42km da kaba pyndep ha ki 5:50:24 sekhon.
