Shillong, Risaw 29
Ki nongrep sohsaw ki la pynpaw ka jingsngewduhnong namar u sohsaw uba ki la rep u la hiar dor haba ki leit die sha ïew kaba la poi tang shiphew tyngka shi kilo.
Uwei na ki nongrep na ki thaiñ Mawryng-kneng u la ïathuh ba ha u bnai Nailur mynta u snem u sohsaw ha ïewduh lada ki leit die u poi haduh 30 tyngka haduh 35 tyngka shi kilo hynrei mynta ka taïew u la hiar dor sha ka 10 tyngka haduh 12 tyngka shi kilo.
U la ïathuh ba ka dor jong u sohsaw uba la lah ban pynim ïa ki nongrep ka long lada la lah ban die 30 tyngka haduh 35 tyngka shi kilo hynrei ban die tang 10 tyngka shi kilo ka la pynduh nong shaba palat.
Shuh shuh u la pynpaw ba kito ki mahajon kiba thied 10 tyngka shi kilo na ki nongrep ynda ki la die khutia sha ki paidbah ha ïew ka poi haduh 40 tyngka shi kilo.
“Ngi ju kit beit shi kriah lada ngi die tang 10 tyngka lada khate noh ka bai kali, bai kit bad bai khrong ban rung sha ïew, ki ïoh sa tang 400 tyngka,” u la ong.
U la pynpaw ba ka jinghiar dor jong u sohsaw ka lah ban dei ba la jyllei u sohsaw na kiwei ki Jylla.
U la ong ba ka jingrep sohsaw ka long kaba jynjar bha naduh por ba thung bad ban sumar hynrei lada jur u slap bad hap u phria ruh ka bun ka jingduhnong.
Kumta u la kyntu ïa ka Sorkar ba kan ïarap lem ïa ki nongrep khamtam haba hiar dor u sohsaw.
U la pyntip ba ka jingkheit ïa u sohsaw ka dei naduh u bnai Jymmang haduh u bnai Naiwieng.
