Lahore, Risaw:
Ka nongbah Lahore jong ka Pakistan, ha kane ka sien, ka la ioh ia ka nam sniew kum ka nongbah ba jaboh tam ha ka pyrthei, ha kaba, ka jing jaboh jong ka lyer ha katei ka nongbah la ong ba ka la palat ia kaei kaba ka WHO ka la buh antad baroh shi katta.
Katba ka Punjab – kaba don ia ka Lahore kum ka nongbah jongka – kam don la ka jong ka jingkheiñ- jingdiah, lane ka jingpeit thuh ia ka jingkhuid bad jinglong- jingman jong ka lyer, ka sorkar jylla ka la ong ba ka dang pyntreikam bha ia ka Smog Emergency Plan, khamtam ha Lahore.
Katkum ka jingkheiñ jong ka IQAir, ka air quality index (AQI) jong ka Lahore, ka la kiew sha ka jinglong kaba kham sniew haduh katta bad ka Hazardous Level ka la kot 312 bad PM2.5, kaba long ka jingma kaba khraw ia ki paidbah ba kin im bad ring mynsiem ha katei ka jaka kaba dap da ka lyer jaboh.
Ha ka Sngi Nyngkong ha ka por 10 baje mynstep, ka Lahore ka la wan hakhmat eh ha ka thup jong ki nongbah kiba heh ha ka pyrthei, da kaba tam ïa kiwei pat ki jaka ba don ka jingjaboh kaba man ka por kum ka Delhi (AQI 220) bad ka Kolkata (AQI 170), la bynrap shuh shuh ka kyrwoh.
Ka jingdon jong ka PM2.5 ha ka lyer jong ka Lahore ka long bunsien tam ïa ki kyndon jingïada ha ka pyrthei, kaba la nang kyntiew ïa ka jingma jong ki jingshitom ring mynsiem bad jingpang sniehdoh nalor kiwei pat ki jingeh kiba shyrkhei ba iadei bad ka koit- ka khiah, khamtam eh naka bynta ki khynnah bad ki tymmen.
