Nongpoh, Risaw 29
Ka ophis treikam u Superintendent of Police (SP) ka Ri Bhoi District kum shi bynta ka jingrakhe ïa ka Rashtriya Ekta Diwas (National Unity Day), 2025, kaba dei ruh ka sngi kha jong u Sardar Vallabhbhai Patel, ha ka 31 tarik mynta u bnai kan pynlong ïa ka jingïakop mareh marathon, kaba baroh ki paidbah ki lah ban wan ïashim bynta.
Katei ka jingïakob mareh ka dei ha ka jingjngai kaba 5 kilometer, ka ban sdang ha ka por 6:30 mynstep jong ka 31 tarik na Saiden Indoor Hall ter ter shaduh sha NSCA Indoor Hall ha Umlyngkdait ha kaba ki nongjop, kin ïoh ïa ki khusnam pisa kiba la pynkhreh da katei ka ophis.
Ki paidbah kiba kwah ban ïashim bynta ha kane ka jingïakob mareh mathon, ki dei ban leit pynrung kyrteng ïalade ha ka ophis treikam jong u District Sports Officer ka Ri Bhoi, ka ban sdang naduh ka 29 tarik mynta u bnai ter ter haduh shwa jong katei ka sngi ban mareh.
Halor kane ka bynta na ka liang ka ophis jong u SP ka Ri Bhoi, ka la wer bad khot sngewbha ïa baroh ki paidbah ba kin wan ban ïashim bynta ha kane ka jingïakob mareh marathon bad ka jingthmu ka long ban wanrah ïa ka jingkoit jingkhiah, ka jingïatylli bad ka mynsiem jong ka jingïatreilang.
