Shillong, Risaw 29
U nongïalam ka AICC ba peit ïa ka Meghalaya, u Dr A. Chellakumar, u la kyntait ba ka don ka jingthmu ban bujli ïa u Bah Vincent H. Pala kum u President ka Megha-laya Pradesh Congress Committee (MPCC), da kaba ong ba kam don kano-kano ka jaka kaba lait ne thylli ha katei ka kyrdan.
Haba jubab ïa ki jingkylli halor ka jinglong nongïalam u Bah Pala, u Dr. Chellakumar u la ïada ïa u da kaba ong, “Kumno phi lah ban ong kumta? Tang namarba don kiba la mih noh na ka Congress, kam mut ba ka dei ka jingbym larkam ha ka jinglong nongïalam.”
U la bynrap ba kito kiba mih noh na ka seng bunsien ka dei namar ki jingmyntoi shimet bad ba ka Congress kam don hangne ban “buh ïa ka khusnam na ka bynta ki katto-katne ki ‘riew shimet.”
U Dr. Chellakumar u la ai jingïaroh ïa u Bah Pala da kaba ong ba u dei u dkhot uba ïaineh ha ka jingshaniah bad uba aiti lut ïalade ha ka Congress – uba la shakri kum u Myntri ha ka Sorkar Pdeng bad uba trei shitom ruh kum u President ka PCC.
“Mynta ki briew kiba la mih noh na ka Congress ki wan phai biang, bad kito kiba la shakri ïa ka Jylla ha ki bynta bapher-bapher ruh ki la wan rung sha ka seng, da kaba pdiang ïa ka jinglong nongïalam jong u Bah Vincent Pala,” u la ong.
Utei u heh ka AICC u la ban jur ruh ba ka Congress ka dei ka seng kaba buh nyngkong eh shuwa ïa ka ri hakhmat bad ka plie lad ban pdiang sngewbha biang ïa kito kiba la sngewthuh ïa la ki jingbakla bad kiba kwah ban shakri ïa ki paidbah.
“Ngim don hangne ban thied ïano-ïano kumba leh kiwei pat ki seng saiñ pyrthei,” u la ong.
“Da kaba pdiang ïa ki nongrim jong ka seng Congress, uno-uno u lah ban pynïasoh ïalade sha ka seng,” u la ong.
