Shillong, Risaw 30
Tang hadien shi sngi, ka Nongkseh SC ka la ïoh biang ban bat ïa ka kyrdan ba hakhlieh ha ka lympung ïalehkai 1st Division Football League-2025 ba la pynïaid da ka Shillong Sports Association (SSA), hadien ba ka la lah ban pynliem noh ïa ka Mawkhar SC da 5-0 kol ha ka sngi Palei.
Ha kane ka jingïakhun ka Nongkseh ka la lah ban ïalehkai bha naduh kaba sdang ha kaba ka la ïoh ban thep ar kol ha ka kylla step lyngba u Banpynkhrawnam Nongkhlaw ha ka minit kaba 6 bad u Chesterpaul Lyngdoh (24). Kane ka kynhun hapoh ka jingïalam u Bah Richard Nongneng (coach) ka la thep biang sa lai kol lyngba u Baïaikara Swer (55), kumjuh u Mebankhraw K Wahlang (65) bad u Kitboklang Pale (75) na ka bynta ban khur syndon ïa ka jingjop.
Lyngba kane ka jingjop kaba hynriew ka Nongkseh ka la ïaryngkat mar 16 poiñ bad ka Meghalaya Police F.T, hynrei ka Nongkseh ka la tam lyngba ka jingïapher ha ka jingthep kol (+34 la +17) na ka bynta ban bat ïa ka kyrdan ba hakhlieh.
